Al è disponibil il bant 2018 di Suns Europe

Al è disponibil il bant 2018 di Suns Europe: il modul si lu cjate alì de direzion call.sunseurope.com

SUNS EUROPE – BANT 2018

 

CE ISAL SUNS EUROPE?

SUNS EUROPE al è un festival des arts intes lenghis minorizadis de Europe che si tignarà a Udin (Friûl) tra il prin e i 2 di Dicembar dal 2018 alì dal teatri “Giovanni da Udine”.

Il festival al à chê di presentâ lis miôr produzions artistichis in lenghe minoritarie, massime chês che a son espression de contemporaneitât, e al cjape dentri musiche, cine, teatri e leterature.

Suns Europe al è inmaneât des cooperativis Informazione Friulana e PuntoZero cu la poie finanziarie de ARLeF – Agjenzie Regjonâl pe Lenghe Furlane e de Regjon Autonome Friûl – Vignesie Julie, e cu la colaborazion di altris realtâts publichis e privadis.

 

A CUI SI INDRECIAL IL BANT?

Il bant al inten dome la sezion musicâl dal festival e si indrece ai grups e ai autôrs che la lôr produzion e je intune lenghis minorizadis.

A puedin partecipâ ducj i artiscj espression di comunitâts linguistichis minoritariis de Europe (intindude te sô dimension fisiche) cussì cemût che a son definidis dal articul 1 de Cjarte europeane des lenghis regjonâls o minoritariis*.

 

*ARTICUL 1 DE CJARTE EUROPEANE DES LENGHIS REGJONÂLS O MINORITARIIS

  1. a) cun «lenghis regjonâls o minoritariis» si intindin lis lenghis dopradis storichementri sul teritori di un Stât dai citadins di chel stes Stât che a formin un grup plui piçul par numar rispiet al rest de popolazion statâl; e diviersis de(s) lenghe(is) uficiâl(s) dal Stât;

cheste espression no cjape dentri lis varietâts de(s) lenghe(is) uficiâl(s) dal Stât e nancje lis lenghis dai migrants;

  1. b) cun «teritori là che si dopre une lenghe regjonâl o minoritarie» si intint la aree gjeografiche là che cheste lenghe e je espression di un numar di personis che al justifiche l’ûs di diviersis misuris di protezion e di promozion previodudis di cheste Cjarte;
  2. c) cun «lenghis no teritoriâls» si intindin lis lenghis dopradis di un pôcs di citadins dal Stât che a son diferentis de(s) lenghe(is) doprade(is) dal rest de popolazion statâl ma che, cundut che storichementri a son dopradis sul teritori dal Stât, no si pues leâlis a di une aree gjeografiche specifiche di chest ultin.

 

CEMÛT SI FASIAL PAR PARTECIPÂ?

Par partecipâ si à di compilâ il modul disponibil in rêt dentri dai 30 di Lui dal 2018.

Il modul si lu cjate alì de direzion call.sunseurope.com e al à di jessi compagnât dai materiâi seguitîfs:

  • curriculum dal grup in formât pdf;
  • foto dal grup in formât jpeg cun risoluzion alte;
    • toc musicâl in formât mp3;
  • test in lenghe origjinâl e traduzion par inglês in formât word;
  • liberatorie par doprâ i dâts daûr di ce che si specifiche te informative di pueste che si cjate sul sît internet dal festival.

 

CE CARATERISTICHIS ÀNO DI VÊ I ELABORÂTS?
Si ametin dome composizions origjinâls che no partegnin al repertori tradizionâl des comunitâts di divignince.

 

CEMÛT VEGNIE FATE LA SELEZION?
I artiscj a saran selezionâts dal comitât artistic di Suns Europe.

Se dal câs, la organizazion e pues selezionâ altris partecipants ancje fûr di chest bant.

La selezion e sarà fate dentri dal prin di Setembar dal 2018. Po, vie pueste eletroniche, si proviodarà a visâ dai risultâts ducj chei che a àn partecipât al bant.

 

CE AIAL DI SAVÊ CUI CHE AL PARTECIPARÀ AL FESTIVAL?
I artiscj selezionâts a saran invidâts a partecipâ al festival par sunâ dal vîf la lôr cjançon il prin di Dicembar dal 2018 a Udin (Friûl).

La organizazion e cirarà di dâi ai artiscj la pussibilitât di presentâ la lôr produzion musicâl ancje in altris moments de manifestazion. Il dulà e il cemût che si davuelzaran chestis esibizions si larà a decidilu daûr des disponibilitâts dai artiscj e des dibisugnis logjistichis e organizativis.

Tal moment che a confermin la lôr iscrizion, i artiscj a varan di dâ la disponibilitât di ducj i membris dal grup a viazâ jenfri i 29 di Novembar e i 3 di Dicembar dal 2018. Cun di plui, i si domandarà di podê doprâ la cjançon che a proponin sei par promovi la manifestazion, sei tal câs che si fasin dai materiâi omaç.

Lis spesis di viaç, di alozament e pal mangjâ dai artiscj selezionâts a son a caric de organizazion.

La organizazion, in colaborazion cui artiscj, si ten in bon di contatâ lis istituzions di riferiment des lôr comunitâts di divignince cun chê di otignî un jutori economic par cuvierzi chescj coscj.

 

VARIAZIONS

Tal câs che si vedi di mudâ il lûc o la date de manifestazion, ducj i artiscj selezionâts a saran visâts par timp de organizazion. Chel istès si lu fasarà tal câs che si vedin altris variazions significativis.

 

CONTATS

Par cualsisei domande, sclariment o informazion baste scrivi ae direzion di pueste eletroniche info@sunseurope.com