Al vie la prevendite dai biliets pal concierton!

E cres la spiete pe gnove edizion di Suns Europe, il festival des arts in lenghe minorizade – nassût di un progjet de cooperative Informazion Furlane cu la poie finanziarie de ARLeF – Agjenzie Regjonâl pe Lenghe Furlane, de Regjon Autonome Friûl Vignesie Julie, dal Comun di Udin e de Fondazion Friuli –, in program a Udin (e provincie) dai 29 di Novembar ai 2 di Dicembar dal 2018

BILIETS IN VENDITE PAL CONCIERT-EVENT – Ancje par cheste cuarte edizion il moment plui spietât dal public al è dal sigûr chel dal conciert-event in program il prin Dicembar, des 21, al Teatri Gnûf Giovanni da Udine. I biliets a son disponibii su vivaticket.it  o intai ponts di vendite autorizâts.

MUSICHE DI CUALITÂT – Chê dal ‘concierton’ e sarà une serade fate di biele musiche, divertiment e colôr, in stât di maraveâ ancje chei plui setics. Une serade che no tu ti spietis, parcè che Suns Europe nol è un festival di folclôr, ma une manifestazion zovine, vivarose, e che al olse simpri intes sôs propuestis artistichis. Il so obietîf al è clâr: “Promovi lis produzions artistichis contemporaniis intes lenghis minorizadis europeanis cul fin di sostignî la costruzion di une Europe diferente, unide inte diversitât, fondade sui dirits, sul pluralisim, sul rispiet e su la colaborazion”. Sul palc di là dai parons di cjase dal Friûl, a sfidâsi a saran i artiscj che a vegnin dal Cjanton dai Grisons, dai Paîs Catalans, ma ancje de minorance svedese de Finlande, e po dopo de Galizie, dal Paîs Basc, dal Gales, de Basse Sassonie e de Ladinie. Al sarà un ‘duel’ ae ultime note e, come simpri, che al vinci il miôr.