Schedis dai Events di Domenie 2 di Dicembar

Teatri San Giorgio, Udine

DOCU-STORIIS

14:30

Docu-storiis al met adun trê novitâts cinematografichis par furlan. “Pozzis-Samarcanda”, lavôr di Stefano Giacomuzzi cumò in produzion, al conte il viaç dal Cocco (Alfeo Carnelutti) des monts dal Friûl al Uzbekistan suntune Harley Davidson dal 1939. Il documentari “Emigrant” di Marco D’Agostini invezit, al cjape spont dal spetacul teatrâl “”Emigrant” – Chant du Friûl” interpretât di Nadia Fabrizio, par resonâ di identitâts migrants. “Int/Art” di Dorino Minigutti e Giorgio Cantoni al propon la tierce part de serie dedicade a zovins artiscj e creatîfs furlans che a contin la lôr art e il lôr leam cuntune lenghe minorizade.

Proiezion: KM100 16:00

Di Francesca Valentini

Aleria. Chilometri 100 de statâl 198. Al centri tal 1975 di events che a rapresentin un passaç centrâl, par no dî la fonde, dal nazionalisim cors dal dì di vuê. Cul so documentari “KM100”, la artiste e regjiste Maria Francesca Valentini e ufrìs une cjalade origjinâl sui mudaments di chest lûc simbolic, e interoghe il presint e il passât, si môf jenfri memorie e atualitât politiche, e cîr la ereditât ideâl e materiâl lassade dai protagoniscj di chei agns.

Amb indignació i esperança: el llaç groc dels catalans 17:00

Incuintri cu la gjornaliste catalane Maria Xinxó Morera

Il floc zâl al è deventât un simbul che al va plui innà de manifestazion di solidarietât pai presonîrs politics e pai esiliâts catalans. Al pant la indignazion e la sperance che a travanin la societât catalane. Al è une domande di justizie, une rivendicazion di dirits di fonde e un berli di libertât. Cul so libri “Jo també porto el llaç groc” la gjornaliste Maria Xinxó e conte, a partî di cent ritrats, lis resons che a sburtin disinis di miârs di catalans a puartâ intor ogni dì chest simbul.

Proiezion: Amama 18:00

Di Asier Altuna

Tal so secont luncmetraç di finzion, il regjist basc Asier Altuna al bandone la ande ironiche di “Aupa Etxebeste!” par frontâ i contrascj che a dividin paris e fîs, passât e presint. Lu fâs cul contâ la storie de famee di Tomás e di sô fie Amaia, rapresentants di dôs manieris contrariis di intindi la vite. Testemone dai lôr scuintris e je la none, o sei la amama dal titul, che i siei cidins a fevelin dispès plui di milante peraulis. Vincidôr de cuinte edizion dal Babel Film Festival di Casteddu / Cagliari.

Musiche 20:00

cun Laura Hoo in acustic

Donald dal Tiliment 21:00

di Stiefin Morat cul Coletîf Teatro Sosta Urbana

Spetacul teatrâl

Il romanç “Donald dal Tiliment” di Stiefin Morat al cjape vite cuntun spetacul che al met adun musiche, recitazion e ilustrazion dal vîf. I atôrs dal Coletîf Teatro Sosta Urbana si dan dongje al grup musicâl “The High Jackers” e al ilustradôr Paolo Cossi, par proponi une gnove pontade des aventuris scalembris di Saco e Pidins a torzeon par un Friûl fantastic là che si incrosin cun chês di Donald Duck, puartant il spetatôr dentri di une bissebove psicolinguistiche inzirlose.