Volontaris

SUNS Europe al è il festival dulà che artiscj, lenghis e comunitâts di dut il continent si contin e si confrontin. Suns, visions, peraulis, ideis, espressions di identitâts che a esistin e che a resistin, che si (ri)cognossin in maniere dinamiche e creative. SUNS Europe al nas a Udin, in Friûl, cûr multilengâl de Europe, e al è un festival che za di diviersis edizions al assegne un premi aes miôr produzions artistichis di musiche, cine e leterature tes lenghis minorizadis dal continent. SUNS Europe: par une Europe pardabon unide inte diversitât.

Se tu âs voie ancje tu di cognossi di dongje cheste Europe, e di vivi il Festival ancje di daûr des cuintis, jentre tal grup di SUNS Europe 2018 (29/11 – 2/12)

Pe buine riesside des trê zornadis dedicadis ae musiche, al cine, al teatri e ae leterature, di fat, o vin bisugne di un grup di zovins cuntun biel pôc di snait che si impegni par dâ, te maniere miôr, il bon acet e il supuart ai tancj artiscj che a rivaran di dute Europe te capitâl dal Friûl.

Par partecipâ al baste mandâ il modul di adesion che tu cjatarâs sul sît, dentri di lunis ai 29 di Otubar dal 2018. I candidâts selezionâts a ricevaran une conferme vie e-mail.
Par vê plui informazions: volontari@sunseurope.com

I volontaris selezionâts a ricevaran un atestât di partecipazion.
L’impegn dal volontari al previôt la partecipazion a doi incuintris formatîfs prime dal inizi dal festival.

MANSIONS

  • Compagnâ i artiscj intes ativitâts par dute la durade dal festival
  • Supuart logjistic al festival
  • Supuart tecnic pai events leâts al festival
  • Supuart pes ripresis e pes fotos
  • Info point

RECUISÎTS

  • Vê plui di 18 agns
  • Buine cognossince de lenghe inglese o di altris lenghis
  • Buinis capacitâts di relazion cu lis personis
  • Tante voie di colaborâ e di stâ insiemi cun altre int

Iscrivisi