La ilustrazion si ispire al «narobe svet», il motîf tradizionâl sloven dal mont sotsore, là che i animâi a cjapin il puest dai oms e a fasin fieste par chest savoltament. Achì la metafore si fâs imagjin par contâ lis lenghis minorizadis: par solit metudis in bande, dilunc vie dal festival a son al centri de sene, ad in plen protagonistis di un ordin ribaltât a lôr pro.
La opare e je presentade in dôs versions, pensadis par compagnâ i diviers moments di Suns Europe 2026: une pal dì, lusorose e vivarose, leade ai events colaterâi, e une pe gnot, plui cjariade e teatrâl, pensade pai concierts. Lis dôs variantis si fevelin tra di lôr cemût che a fasin chestis dôs musis dal festival.
SUNS Europe al è il Festival european des arts performativis in lenghe minorizade.
Al è un lûc là che a puedin cjatâsi e confrontâsi i artiscj, lis lenghis e lis comunitâts che in dut il continent a tirin fûr la lenghe par contâsi di un pont di viste unic.
