Librarie Tarantola, Udin.
18:00 – presentazion.
Lenghis di riferiment: basc, castilian, furlan.
Descrizion: la vicende dai esiliâts politics bascs e je stade a dilunc discognossude fintremai framieç di une part impuartante de stesse societât basche cundut che, jenfri 1960 e 2010, a son stâts uns 2.500 chei che a àn vût di scjampâ inaltrò, in paîs, cundizions e moments diviers. Deventâ ombris cence non al è stât sante scugne par evitâ la repression o ancje dome par sorevivi. «Bestaldean. Euskal iheslari politikoen bizipenak» (Txalaparta, 2022) – Di chê altre bande. Storiis di dispatriâts politics bascs – al rapresente un tentatîf di capî ce che al è daûr di chestis ombris. Par mieç di intervistis e di altris testemoneancis, il libri nus compagne tun viaç di chê altre bande: chê dal esili o de clandestinitât, dal dolôr e de solidarietât, de lote par vivi libars e dal sium di podê tornâ, in fin, te tiere là che si è nassûts.
Protagoniscj: Jaione Dorai e à studiât gjornalisim alì de UPV e master in studis bascs a Baiona. Par vie dal so impegn cul moviment popolâr basc, tal 2009 e à vût di scjampâ tal Paîs Basc dal Nord sot aministrazion francese (Ipar Euskal Herria) e dome tal 2014 e à podût tornâ a cjase. Cumò e lavore tai servizis linguistics in Navare. Acusât di jessi un dirigjent di Ekin, Ernesto Prat al à vivût in esili in Ipar Euskal Herria dal 2008 al 2012 cuant che al è stât arestât a Urruña. Dopo de assoluzion, al è tornât in Navare dulà che cumò al lavore tal cjamp dal arlevament. Intant de clandestinitât al à tacât a scrivi contis. Al è autôr di trê romançs: Hiru Lunargi laugarren (Metaziri, 2013), Orpoz orpo (Txalaparta, 2014) e Telleria eta gero, zer? (Elkar, 2017).
Introdusût e moderât di: Carli Pup
In colaborazion: cu la librarie “Tarantola” di Udin.
Prime presentazion fûr dal Paîs Basc
Jentrade libare.