SUNS Europe al è il festival european des arts in lenghe minorizade.
Nassût intal 2009 par sburtâ grups e musiciscj che a cjantavin intune des lenghis minorizadis de aree alpine – mediteranie, in dì di vuê al è un lûc di incuintri e di confront des miôr produzions artistichis che a rivin des comunitâts minorizadis dal nestri continent. Suns duncje, ma ancje cine e leterature che a palesin, cun visions e peraulis, identitâts che a esistin e che a resistin.
SUNS Europe al nas a Udin, in Friûl, cûr multilengâl de Europe, e no par câs. Cun di fat, la anime de manifestazion e je Radio Onde Furlane che, propite de capitâl dal Friûl, dal 1980 incà e va dilunc a trasmeti musiche e culture cul furlan come lenghe veicolar. L’ARLeF, Agjenzie Regjonâl pe Lenghe Furlane, e à crodût fin dal principi tal progjet e lu à judât in pôcs agns e cjapâ une dimension ancjemò plui europeane, motôr di ideis, miscliçaments e creativitât.
SUNS Europe al premie ogni an lis miôrs produzions artistichis intes lenghis minorizadis europeanis. L’intindiment al è di fâ vivi chestis lenghis intal dì di vuê, cence nostalgjie, par che a sedin culture vive e vivarose, e no folclôr. Par une Europe pardabon unide te diversitât. Per une Europe pardabon Europe.