Plui lenghis, plui culture, plui Europe

25/11/2022
17:30 – incuintri
Mediateche di Gurize

Jessi Capitâl europeane de Culture e je une ocasion par gjoldi di une visibilitât internazionâl plui marcade, par dâi plui snait ae vite culturâl di chel teritori e ancje par sburtâ invistiments che a judin la economie locâl. Pes comunitâts là che si fevelin plui lenghis e pues jessi ancje une oportunitât par meti in biele mostre cheste pluralitât linguistiche e culturâl e, massime, par valorizâ e promovi chês, tra lis sôs lenghis, che si cjatin a vivi une condizion di minorizazion.

Te citât di Gurize e tal teritori dulintor si fevelin talian, sloven a furlan ma, dilunc vie de storie, si à vude ancje une presince impuartante de lenghe todescje e de culture ebraiche. Chest pluralisim linguistic e culturâl al à paiât però un presit une vore alt vie pal secul stât, scliçât sot dal pês di totalitarisims e nazionalisims. La assegnazion dal compit di fâ di Capitâl europeane de Culture tal 2025 ae/s citât/s di Nova Gorica e Gurize e devente duncje une ocasion straordenarie par valorizâ cheste pluralitât linguistiche e culturâl, a partî di chês lenghis che a son stadis minorizadis plui a fuart.

In chest sens, un esempli impuartant al pues rivâ di altris Capitâls europeanis de Culture che, tai agns stâts, a son stadis buinis di valorizâ e promovi la lôr pluralitât linguistiche. Al è il câs, juste par fâ doi esemplis, de citât di Donostia – San Sebastián (Comunitât Autonome Basche, Ream di Spagne) intal 2016 e di chê di Leeuwarden – Ljouwert (Frisie, Ream dai Paîs Bas) intal 2018. La citât basche e à leât il so non a di un protocol sui dirits linguistics che al è stât metût adun, in gracie dal lavôr di une rêt di colaborazion tra diviersis comunitâts minorizadis europeanis, propite te suaze des azions che a àn compagnât l’an che Donostie e je stade Capitâl de Culture. La produzion culturâl in lenghe frisone e je stade invezit une des protagonistis dal program proponût intal 2018 de citât di Leeuwarden – Ljouwert e e à favorît la sielte de citât tant che capitâl UNESCO de leterature vie pal 2019.

Par presentâ chescj esemplis di “buinis pratichis”, Suns Europe al à decidût di puartâ a Gurize – cu la sperance che chestis testemoneancis a puedin dâ une man a valorizâ la pluralitât linguistiche e culturâl dal nestri teritori in ocasion di Go2025 – doi dai protagoniscj di chês esperiencis. Paul Bilbao Sarria al è il segretari gjenerâl de ONG “Kontseilua”, il Consei des organizazions sociâls impegnadis pe lenghe basche, e al à coordenât il procès che tal 2016 al à puartât al Protocol di Donostia (protocol pe tutele dai dirits linguistics). Ernst Bruinsma al è diretôr dal progjet Leeuwarden Citât de Leterature, che al à fat di cheste citât un pont di riferiment internazionâl pe leterature, ancje tes lenghis di minorance.

Tal incuintri di Gurize, Bilbao e Bruinsma a presentaran chestis dôs esperiencis puartant sponts sei pe programazion di Go2025, sei par iniziativis che inte nestre regjon a vedin chê di valorizâ lis lenghis minorizadis. In vierzidure dal apontament, dopo dai salûts istituzionâi e dai organizadôrs, il cornic Davyth Hicks – segretari gjenerâl di ELEN (European Language Equality Network) e espert di dirits linguistics e promozion des lenghis minorizadis – al insuazarà il teme de valorizazion des lenghis minorizadis a nivel continentâl. A moderâ, Marco Stolfo, docent di Storie contemporanie e des comunicazions di masse tal cors di lauree in Relazions Publichis inte sede di Gurize de Universitât di Udin.

Jentrade libare.