Si vierç cu la presentazion di “Guillem” la sezion leterature di Suns Europe. L’apontament, in program sabide ai 29 di Avost aes 18.15, li de Librarie Friuli di Udin, al propon un confront jenfri la autore dal romanç, la scritore e gjornaliste Núria Cadenes cun Carlo Puppo, president de cooperative Informazione Friulana che ogni an e organize il festival dee arts tes lenghis minorizadis cu la poie finanziarie de Regjon F-VJ e de Agjenzie Regjonâl pe Lenghe Furlane (ARLeF). sassinât di un grup di neofassiscj ai 11 di Avrîl dal 1993 a Montanejos (Paîs Valenzian). Al jere un atlete, un antifassist, un indipendentist. Al veve dome 18 agns. Il so omicidi al à metût in evidence i leams tra ambients de drete estreme e fuarcis di polizie, lis manipolazions de stampe, la impunitât di cierts crimins di odi. La sô e je une storie che e à segnade une gjenerazion interie e che e à rindût Guillem Agulló un simbul di libertât. Il romanç «Guillem» di Núria Cadenes al conte cun partecipazion umane e tal stes timp cul rigôr de croniche la storie di chest fantat impegnât e combatîf, e chê dal Paîs Valenzian di chei agns. Une storie che e à tocjât di dongje ancje Cadenes che, nassude a Barcelone, vuê e vîf a Horta Sud (València) e, tant che Guillem, e à militât tal moviment indipendentist di zovins “Maulets”. Autore di diviersis publicazions – Cartes de la presó (1990), L’Ovidi (2002), El banquer (2013) e Secundaris (2018) – e scrîf par diviers orghins di informazion tant che Vilaweb e El Temps.
L’EX SINDIC DI PAMPLONE – Si fevelarà furlan, basc, spagnûl e talian (ancje graciis aes traduzions di Pablo Gortan) ai 31 di Avost, aes 20.30, in place a Murùs (se al ves di plovi: Auditorium “Riedo Puppo”) pal secont event leterari in calendari. Il storic basc Joseba Asiron e l’inteletuâl furlan Angelo Floramo a daran vite a “Conquista! Storiis resistentis tra Navare e Friûl”, une serade là che si confrontaran i 600 agns de colade dal stât patriarchin di Aquilee cun chei de colade dal ream de Navare dal 1512. Lis dôs vicendis no dan dome la pussibilitât di resonâ su events storics che a presentin cetancj ponts in comun, ma ancje su lis consecuencis che a àn vût su lis comunitâts coinvoltis, su cemût che la storiografie “uficiâl” e à cirût di gjavâi fuarce ae nature stesse di chês vicendis e su la riscuvierte di simbui, fats e protagoniscj di chel moment storic par tornâ a dismovi lis cussiencis. Un percors che al travierse la storie e la memorie par fevelâ de nestre atualitât. Se l’inteletuâl nostran nol à bisugne di presentazions, e za ducj a cognossin lis sôs grandis capacitâts oratoriis e i siei tancj libris, jenfri chescj Balkan Circus (2013), L’osteria dei passi perduti (2017) e La veglia di Ljuba (2018), di Asiron, impegnât in politiche cu la çampe indipendentiste basche, o podìn dî , tant che prime robe, che dilunc de legjisladure stade al è stât sindic di Pamplone (Iruñea), citât là che alè nassût. Laureât in storie de art, insegnant, al à scrit diviersis publicazions e inmaneât cetantis iniziativis publichis dedicados ae resistence e ae concuiste de Navare tra chescj 50 fechas clave de la conquista de Navarra (2013).