A Suns Europe la anteprime regjonâl di Missus

“Missus” al sarà trasmetût in anteprime furlane vinars prin di Dicembar al Teatri Gnûf Giovanni da Udine te suaze dal festival des lenghis minorizadis Suns Europe

A Suns Europe la anteprime regjonâl di Missus
UDIN – E je la storie di un dirit mancjât. Di une bataie che un grup di predis furlans al è daûr a puartâ indenant zaromai di agns in face de Glesie di Rome. A contâle al è stât Massimo Garlatti-Costa che cul docu-film “Missus” al vûl dâi vôs ai protagoniscj di Glesie Furlane e presentâ la vite dai ultins predis che di 40 agns incà a domandin il dirit di podê doprâ la proprie lenghe sei te liturgjie che te vite di ogni dì. “Missus” (produsût di Raja Film e Belka Media) al sarà proietât in anteprime furlane vinars prin di Dicembar alì dal Teatri Gnûf “Giovanni da Udine” a nûf di sere (si jentre sore nuie fintremai che a son puescj libars) te suaze dal festival des arts intes lenghis minorizadis Suns Europe (Udin, 30 di Novembar-2 di Dicembar). Si fevele di anteprime furlane dal moment che il docu-film al à za fat il zîr dal Stât talian, ospit di diviersis comunitâts minorizadis.
«O contìn la storie dai predis di Glesie Furlane – al spieghe il regjist, Massimo Garlatti-Costa – e la lôr lote par che al vegni ricognossût un dirit, chel di podê di messe par furlan. A àn tacât a domandâlu tal 1974 e a van dilunc a fâlu, cun indurance. O crôt che chescj ultins predis restâts – al continue il regjist – a puedin insegnâ cetant ai plui zovins: cuant che si crôt pardabon in alc e si sa di jessi tal just, si à di lâ indenant a lotâ par otignîlu. Chel che e domande Glesie Furlane al è un dirit che dut il popul furlan al varès di pratindi, di là che si crodi o no». Missus al conte la storie di 40 agns di lote pe afermazion concrete e plene di cheste dignitât e di chest dirit: par che la lenghe e sedi un mieç di libertât e di espression de identitât, massime par chei popui plui piçui che a àn inte lenghe un imprest vêr di sorevivence.
Une bataie tacade ai 28 di Avost dal 1974 cuant che, intant di une celebrazion religjose su lis monts dal Friûl, dîs predis i domandin ai lôr arcivescui di podê dî messe te lôr lenghe: il furlan.
La lôr domande e ven dineade e i predis, par proteste, a lassin sul altâr de glesie un document cu lis lôr domandis. Chest event al invie une crevadure ideologjiche cu la Glesie di Rome. Al è il moment là che e nas “Glesie Furlane”, la Glesie dai furlans.
La lôr bataie e je dople: cuintri dai prejudizis de societât civîl sul doprâ une lenghe minoritarie te vite di ogni dì, e cuintri dai befels dal clericât di Rome che al rive al pont di dineâi ai predis furlans di voltâ il Messâl te lôr lenghe.
I protagoniscj di Missus a son une sorte di druidis dal secul XXI che, tra eroisim e indurance, a puartin indenant une lote che e je la stesse di ducj chei 40 milions di Europeans – Bascs, Sarts, Bretons, Cimbris, Ocitans, Galês, Ladins e tancj altris – simbul de pluralitât culturâl e de ricjece storiche dal nestri continent.
La iniziative e à cjatât l’agrât e la sodisfazion di Glesie Furlane pe decision di dâi vôs ae lôr bataie. “Il lavôr di Massimo Garlatti-Costa al à permetût no dome ae nestre associazion, ma a dut il Friûl di fâsi cognossi ator pe Italie” al à comentât il segretari Christian Romanini che al à po zontât: “Cumò i tocje al Friûl: al è finît il timp là che jessi furlans al jere alc di naturâl: il documentari Missus al conferme che al è rivât il moment pal popul furlan di sielzi se al vûl vê ancjemò un avignî”. Il documentari, produsût ancje in gracie dal finanziament de Agjenzie Regjonâl pe Lenghe Furlane e dal Font Regjonâl pal Audiovisîf dal Friûl – Vignesie Julie, al è sottitulât sei par talian che par inglês par judâ a fâlu zirâ a nivel statâl e internazionâl.

Suns Europe al è un progjet inmaneât des cooperativis Informazione Friulana (editore di Radio Onde Furlane) e Puntozero cu la poie de ARLeF (Agjenzie Regjonâl pe Lenghe Furlane), de Regjon Friûl – Vignesie Julie, dal Comun di Udin e de Fondazion Friuli, cu la colaborazion de Fondazion Teatro Nuovo Giovanni da Udine e dal Babel Film Festival, e cul patrocini dal Consei de Europe.