Place Venerio – Udin 21.00
Cristian Mauro
Se e je une strade che e pee Bruce Springsteen e Lino Straulino, la cjançon di autôr americane e chê par furlan, Cristian Mauro al è daûr a fâle. Nol è tant che al è jessût il so prin album “Buere lontane”.
Nicole Coceancig
La zovine Nicole e je une des vôs furlanis plui espressivis e ispiradis dai ultins agns. A SUNS Friûl e presentarà un progjet centrât su la figure di Jacum Bisot (poete dal so paîs che in pôcs a cognossin) che tra lis dôs vueris mondiâls al à cjolt vie siôrs e sorestants cun rimis plenis di ironie e savietât popolâr.
Trabeat
Dôs ghitaris, bas e batarie. Snait e sudôr. Rock furlan, onest e sclet e, par chest, un pôc romantic. Il lôr repertori al met jù par furlan ancje un pôcs di grancj tocs punk e de cjançon di autôr. Doi albums daûr des spalis e un “Bar Trabeat” denant.
Vididule Project
Il grup al è leât massime ae forme dal teatri cjançon e dopo di un pôcs di spetacui che a metevin dongje la musiche di grancj cjantautôrs ai lôr tocs, intal 2019, a àn produsût il lôr prin album: “Antitesi”. Siet cjançons e un toc strumentâl là che a misturin gjenars diviers tant che folk, rock, pop e blues segnâts dal sun carateristic dal oboe.
Ezpalak (Paîs Basc)
Nassûts a Zestoa, in Gipuzkoa, i Ezpalak a son un dai grups plui potents framieç de za grintose sene musicâl basche. La formazion e à publicât doi albums cuntune identitât sonore cetant marcade fate di ghitarons, psichedelie, noise e riffs che ti colpissin come un pugn intal stomi.
—jentrade libare cun prenotazion