Chest an Suns Europe al sarà eletropop e rock&roll, ma ancje rap, indie rock e cetant ancjemò
Dai 30 di Novembar ai 2 di Dicembar dal 2017
Tierce edizion par Suns Europe: il biel de diversitât in sene a Udin
UDIN – Chest an Suns Europe al sarà eletropop e rock&roll, ma ancje rap, indie rock, percussions eletronichis e cetant ancjemò, parcè che Suns nol è dome musiche. Ta chestis zornadis si è daûr a definî il cuadri dai ospits des trê zornadis (dai 30 di Novembar ai 2 di Dicembar) e, dongje dai ‘parons di cjase’ dal Friûl, si varan grups, regjiscj, scritôrs e atôrs che a rivin di Paîs Basc, Gales, Cjanton dai Grisons, Bretagne, Galizie, Ocitanie, Basse Sassonie, ma ancje de tiere dai Sami, de Irlande, de Sardegne e de Buriazie (logade dongje de Mongolie).
Cemût che al sucêt di trê agns incà, Suns Europe al sarà un confront tra lenghis cuntune storie antighe e formis di comunicazion contemporanie. Un Festival fat di art, miscliçaments, snait, pluralisim linguistic, creativitât. L’apontament al è simpri alì dal Teatri Gnûf “Giovanni da Udine” (ma no dome) dulà che a saran protagoniscj musiche, cine, teatri e leterature intes lenghis minoritariis de Europe.
Ancje tal 2017 Suns Europe si conferme tant che il principâl Festival european che al conte e al fâs cognossi a ducj lis lenghis minorizadis e par chest al gjolt, pe tierce edizion, dal patrocini dal Consei de Europe. L’intindiment al è chel di promovi produzions artistichis origjinâls di cualitât e di mostrâ cemût che la diversitât linguistiche de Europe, in plui di jessi une ricjece culturâl e un dirit di fonde, e je une risorse creative impuartantone. Un centenâr di artiscj a rivaran cussì a Udin par dâi vite a di une vere Babêl di lenghis, di suns e di miscliçaments di no pierdi, e par cjapâ dentri i furlans intai tancj apontaments dal program. La manifestazion si sierarà cu la serade-event che si tignarà tal Teatron di Udin, sabide ai 2 di Dicembar, a partî di 9 di sere.
Fintremai i 13 di Novembar si pues ancje aderî al grup dai volontaris. Baste notâsi cul modul
che si cjate sul sît www.sunseurope.com. Suns Europe al è un progjet inmaneât des cooperativis Informazione Friulana (editore di Radio Onde Furlane) e Puntozero cu la poie de ARLeF (Agjenzie Regjonâl pe Lenghe Furlane), de Regjon Friûl – Vignesie Julie e de Fondazion Friuli, cu la colaborazion dal Comun di Udin, de Fondazion Teatro Nuovo Giovanni da Udine, dal Babel Film Festival e cul patrocini dal Consei de Europe.