Conciert di Maddi, Alffa e Banelli Claudio

E je une zovine artiste che, tal incuintri tra une fonde orchestrâl minimâl e un cjantautorât moderni, e à cjatât il spazi sonôr just par contâ lis sôs emozions cuntune poetiche profonde che e valorize ad in plen la lenghe basche te sô musicalitât e tal so misteri. I siei tocs a àn une ande oniriche là che la poesie si misclice cul dolç e cul scûr de vite di ogni dì.

Nassûts e cressûts a Llanrug – che si lu cognòs tant che il paîs plui galês dal mont – i Alffa a cjapin sù cul lôr sunôr la bielece salvadie e il spirt indomabil de lôr tiere. Inlidrisade tal punk, tal blues e tal rock dai riffs che a sgrifin, la musiche dai Alffa e je crude, urgjente e inconfondibile. A fâ di lescje pe sô esplosivitât al è alc che al va plui insot, o sei il fat che la musiche in lenghe minorizade no je par pôcs ma sante scugne, e je vive, simpri in moviment e… scjassose.

Se la Cjargne e podès sielzi cemût rapresentâsi, tra misteri, fuarce, tradizion e scuvierte, lu fasarès te persone di Claudio Banelli, artist valent in diviersis formis di art che a cjapin dentri la musiche sunade e chê regjistrade e produsude in rût analogjic, ma ancje il mistîr dal bati il fier e la capacitât di contâ une storie che e sgrife tant che un blues e che e je dolce come un cjant “a la cjargnele”.