Sabide ai 6 di Dicembar, 21.00
Teatri Gnûf «Giovanni da Udine», Udin
A paiament
Mali Hâf
Cuntune composizion e cun beats che a metin in belance une ritmiche sclete e cidins minimaliscj cun sintetizadôrs enfatics e sunôrs R&B, la esplosive fantate di Caerdydd si fâs indenant su la sene pop europeane marcant la origjinalitât e il valôr de culture galese cun notis autentichis e ricercje narative, de interpretazion in clâf feminine dal imni dal Gales a tocs che a pandin la cressite personâl e artistiche de sô gjenerazion.
Marius Ziska
Cun melodiis visionariis e inmagadis che si fissin inte memorie emotive za cu la prime scolte, Marius Ziska al è une vuide perfete par scuvierzi la sene faroese contemporanie cun dutis lis sôs sugjestions. Niçulantsi suntune barcje sonore in esplorazion jenfri lidrîs folk e usmis eletronichis, la sô poetiche si fâs vele mestre, sglonfe di emozions, tra fumatis maluseriosis e salustris che a lassin traviodi sul orizont crets maestôs che a vegnin sù dal mâr.
Verde Prato
Artiste complete che e rive di Tolosa, zovine ma cuntune cariere variade e visionarie ancje te piture. Une vôs mai banâl che e rifinìs, cun modalitâts e melodiis origjinâls, lis formis des sôs cjançons tra ritmis minimâi e riclams ae tradizion orâl basche. Une scriture plui che fine che e fronte temis identitaris leâts ae sô comunitât di divignince ma che e je ancje buine di cjalâsi dentri, simpri cu la voie di lâ indenant.
Shardana
Chest an la storie e la culture de Sardegne si mostrin cuntune muse epiche e plene di grinte, cjantadis par sart campidanês cun screams e profonditât liriche. Sonoritâts scuris e potentis ti strissinin e ti contin di un leam vêr cu lis tradizions, lis impresis, i valôrs e i paisaçs di chel antîc popul dal mâr che di lui a cjapin il non.
Pop Corner
Un grup zovin pront a maraveâ cu la lôr scriture pop che e riclame la miôr tradizion cjantautorâl. Chescj fantats, unîts di no dî, a àn une cualitât strumentâl e rangjaments vocâi par ladin cun timbris feminins complementârs e compliçs, bogns di creâ contis origjinâls che a fevelin cun sensibilitât des bielecis e des faturis dal vivi in Val di Fasse.
No Good meets Passion
La colaborazion definitive che la sene furlane e spietave, i tescj poetics e a moments profetics di Passion, rangjâts cul snait sassin dai No Good. Riffs che a fasin saltâ su lis poltronis, critiche sociâl, responsabilitât politiche, une sorte di pro memoria de piês atualitât, ma cun viers che a son un berli di riviel e une sdrondenade, cul motopic.
Lia Sampai
Sonoritâts mediteraniis striadis e rivocs de musiche popolâr dai Paîs Catalans a compagnin il talent di Lia che, cun vôs dolce e di elegance rare, e conte il vivi tes tieris de bocje dal Ebre. Lis sôs cualitâts, ancje di atore, a metin in evidence une scriture semplice ma madure, che e incjante e e inmaghe.