Ce isal SUNS EUROPE?
SUNS EUROPE al è un festival des arts intes lenghis minorizadis de Europe che si tignarà a Udin e in altris lûcs dal Friûl tra i 17 di Lui e i 22 di Avost dal 2021.
Il festival al à chê di presentâ lis miôr produzions artistichis in lenghe minorizade, massime chês che a son espression de contemporaneitât, e al cjape dentri musiche, cine e leterature.
Suns Europe al è inmaneât de cooperative Informazione Friulana / Radio Onde Furlane cu la poie finanziarie de Regjon Autonome Friûl – Vignesie Julie, de ARLeF – Agjenzie Regjonâl pe Lenghe Furlane e de Fondazione Friuli, e cu la colaborazion dal Comun di Udin e di altris realtâts publichis e privadis locâls e internazionâls.
A cui si indrecial il bant?
Il bant al inten dome la sezion musicâl dal festival e si indrece ai grups e ai autôrs che la lôr produzion e je intune des lenghis minorizadis ametudis.
A puedin partecipâ ducj i artiscj espression di comunitâts linguistichis minorizadis de Europe (dome te sô dimension fisiche) intindudis daûr de definizion dal articul 1 de Cjarte europeane des lenghis regjonâls o minoritariis*.
*ARTICul 1 de Cjarte europeane des lenghis regjonâls o minoritariis
- a) cun «lenghis regjonâls o minoritariis» si intindin lis lenghis dopradis storichementri sul teritori di un Stât dai citadins di chel stes Stât che a formin un grup plui piçul par numar rispiet al rest de popolazion statâl; e diviersis de(s) lenghe(is) uficiâl(s) dal Stât;
cheste espression no cjape dentri lis varietâts de(s) lenghe(is) uficiâl(s) dal Stât e nancje lis lenghis dai migrants;
- b) cun «teritori là che si dopre une lenghe regjonâl o minoritarie» si intint la aree gjeografiche là che cheste lenghe e je espression di un numar di personis che al justifiche l’ûs di diviersis misuris di protezion e di promozion previodudis di cheste Cjarte;
- c) cun «lenghis no teritoriâls» si intindin lis lenghis dopradis di un pôcs di citadins dal Stât che a son diferentis de(s) lenghe(is) doprade(is) dal rest de popolazion statâl ma che, cundut che storichementri a son dopradis sul teritori dal Stât, no si pues leâlis a di une aree gjeografiche specifiche di chest ultin.
Cemût si fasial par partecipâ?
Par partecipâ si à di compilâ il modul disponibil in rêt dentri dai 6 di Jugn dal 2021. Il modul si lu cjate alì de direzion www.sunseurope.com e al à di jessi compagnât dai materiâi seguitîfs:
- curriculum dal grup / artist in formât pdf;
- foto dal grup / artist in formât jpeg cun risoluzion alte;
• doi tocs musicâi in formât mp3; - test des cjançons in lenghe origjinâl cu lis traduzions par inglês in formât word;
- liberatorie par doprâ i dâts daûr di ce che si specifiche te informative di pueste che si cjate sul sît internet dal festival.
Ce carateristichis àno di vê i elaborâts?
Suns Europe al è un festival che al valorize lis miôr produzions dal dì di vuê intes lenghis minorizadis e duncje, ancje la sezion musicâl, si propon di meti in evidence lis produzions calcoladis di plui origjinâls e inovativis.
Cemût vegnie fate la selezion?
I artiscj a saran selezionâts dal comitât artistic di Suns Europe.
Se dal câs, la organizazion e pues selezionâ altris partecipants ancje fûr di chest bant.
La selezion e sarà fate dentri dai 15 di Jugn dal 2021. Po, vie pueste eletroniche, si proviodarà a visâ dai risultâts ducj chei che a àn partecipât al bant.
Ce aial di savê cui che al parteciparà al festival?
I artiscj selezionâts a saran invidâts a partecipâ al festival par sunâ dal vîf i lôr tocs intant de serade centrâl dal festival intune cun altris musiciscj o pûr a saran i protagoniscj principâi di altris concierts in program inte suaze de manifestazion. I artiscj a varan di presentâ une cerce de lôr produzion musicâl. Il dulà e il cemût che si davuelzaran chestis esibizions si larà a decidilu daûr des disponibilitâts dai artiscj e des dibisugnis logjistichis e organizativis.
Tal moment che a confermin la lôr iscrizion, i artiscj a varan di dâ la disponibilitât di ducj i membris dal grup a viazâ, se lis cundizions sanitariis e di sigurece lu permetaran, jenfri i 15 di Lui e i 24 di Avost dal 2021.
Cun di plui, i si domandarà di podê doprâ lis cjançons che a proponin sei par promovi la manifestazion, sei tal câs che si fasin dai materiâi omaç.
Lis spesis di viaç, di alozament e pal mangjâ dai artiscj selezionâts a son a caric de organizazion.
VARIAZIONS e situazion sanitarie
Daûr de situazion epidemiologjiche gjenerâl e des misuris in vore ta chê dade par fâi cuintri ae crisi sanitarie, al sarà pussibil che si vedi di cambiâ datis e lûcs dai apontaments.
Tal câs che si vedi di mudâ il lûc o la date de manifestazion, ducj i artiscj selezionâts a saran visâts par timp de organizazion. Chel istès si lu fasarà tal câs che si vedin altris variazions significativis.
Su la fonde des regulis sanitariis in vore, ai ospits selezionâts si podarà domandâi di fâ un tampon PCR SARS-CoV2 tes 48 oris prime di partî.
CONTATS
Par cualsisei domande, sclariment o informazion baste scrivi ae direzion di pueste eletroniche info@sunseurope.com