Scuele Europe | Suns Europe

Sabide ai 6 di Dicembar, 10.00
Teatri Gnûf “Giovanni da Udine”, Udin

LENGHIS DI RIFERIMENT: furlan, talian, inglês, catalan, ladin

DESCRIZION: Artiscj che a rivin di diviersis comunitâts minorizadis europeanis si cjatin cui students des scuelis superiôrs dal Friûl. Une lezion-conciert dedicade ae creativitât, ae educazion plurilengâl e ae citadinance multiculturâl. Une ocasion pai fantats des scuelis di cognossi altris realtâts che, par cierts aspiets, a son dongje di chê furlane. Un dialic a plui vôs e in plui lenghis su pluralisim linguistic e culturâl, viodût tant che valôr, dirit e oportunitât.

PROTAGONISCJ: Intant de matinade a sunaran No Good meets Passion tun incuintri artistic là che il ritmi infogât dai prins si messede cui tescj uçâts di un veteran dal rap furlan, Lia Sampai, une des interpretis plui ispiradis de gnove musiche popolâr catalane, e i Pop Corner, cul lôr pop zovin, legri e par ladin. No mancjaran i intervents di tai didatic cul frison Cor van der Meer dal Mercator European Research Centre, centri specializât intal studi des comunitâts minorizadis dal nestri continent, cul ricercjadôr furlan Marco Stolfo de Universitât dai studis di Udin e cun altris relatôrs.

PRESENTÂT DI: Doro Gjat, Federica Angeli

Pop Corner

Un grup zovin pront a maraveâ cu la lôr scriture pop che e riclame la miôr tradizion cjantautorâl. Chescj fantats, unîts di no dî, a àn une cualitât strumentâl e rangjaments vocâi par ladin cun timbris feminins complementârs e compliçs, bogns di creâ contis origjinâls che a fevelin cun sensibilitât des bielecis e des faturis dal vivi in Val di Fasse.

No Good meets Passion

La colaborazion definitive che la sene furlane e spietave, i tescj poetics e a moments profetics di Passion, rangjâts cul snait sassin dai No Good. Riffs che a fasin saltâ su lis poltronis, critiche sociâl, responsabilitât politiche, une sorte di pro memoria de piês atualitât, ma cun viers che a son un berli di riviel e une sdrondenade, cul motopic.

Lia Sampai

Sonoritâts mediteraniis striadis e rivocs de musiche popolâr dai Paîs Catalans a compagnin il talent di Lia che, cun vôs dolce e di elegance rare, e conte il vivi tes tieris de bocje dal Ebre. Lis sôs cualitâts, ancje di atore, a metin in evidence une scriture semplice ma madure, che e incjante e e inmaghe.