Pokriva Nociva + Don Condor Eta Ñora Alacrán

Vinars 11 otubar, 21:00
Cantine de aziende agricule Gradnik, Cormons (GO)
Jentrade libare

DON CONDOR ETA ÑORA ALACRAN (Paîs Basc)
Don Condor eta Ñora Alacran a son l’alter ego di Niña Coyote eta Chico Tornado, cubie innomenade pal so rock ‘n’ roll ruspiôs e cence compromès. Intant di une tape dal lôr tour mondiâl dal 2017, inceâts dai paisaçs dal desert messican di Rumorosa, a àn decidût di meti sù un progjet laterâl sugjestionât de cumbia e dal surf plui scûr. Tal 2022 a àn publicât un album di cjançons straordenariis che a strissin spandint il tuessin inzingarant di un madrac dal desert.

POKRIVA NOČIVA (Slavie furlane)
Nassûts intal 2021 te Braidova Hiša di Stregne, i Pokriva Nočiva a son un masanin di rock, blues, garage, punk e reggae dulà che si dan dongje i stereotips, lis contradizions e lis bielecis des Valadis dal Nadison. Il debut trionfâl intal Senjam Beneške Piesmi, il festival de cjançon de Slavie furlane, ju à stiçâts a produsi un pôcs di tocs, a publicâ un album e a sunâ ator par concierts, rindintju in curt un grup di cult a nivel locâl. Daûr di une muse ironiche e lizere, i Pokriva Nočiva a platin une anime braurose dal lûc unic e magjic di dulà che a rivin.