Il Festival european al concuiste il public e si conferme pont di riferiment a nivel continentâl. Grant finâl ai 3 di Dicembar. Te sezion musiche premiâts i Steso (Foeroyar) e Veronika Ucholik (Çukotke) Al documentari ‘Sume – Mumisitsinerup Nipaa’ e al scritôr e musicist catalan Xavi Sarrià chei altris Suns Europe Awards
Compagn dal an passât, o ben ancjemò miôr. La seconde edizion di Suns Europe, il Festival european des arts in lenghe minorizade, che dal 1n ai 3 di Dicembar al à puartât a Udin e in Friûl un campionari selezionât di espressions musicâls, cinematografichis e leteraris des minorancis e des nazionalitâts de Europe, e je stade un sucesson sei pe cualitât des propuestis artistichis presentadis che pe partecipazion dal public, ancjemò di plui chel tal 2015.
La Europe in Friûl e il Friûl in Europe
La manifestazion, inmaneade de bande di Radio Onde Furlane / Informazione friulana, cooperative Puntozero e associazion Il Laboratorio cul jutori de ARLeF (Agjenzie Regjonâl pe Lenghe Furlane), de Regjon autonome Friûl-VJ e cu la collaborazione della cooperativa Puntozero e di altris entitâts e istituzions locâls e europeanis, in trê dîs e à ufiert un flus di propuestis siôr e svariât, tra curts e luncmetraçs di Irlande, Paîs Basc, Irlande, Sàpmi, Friûl, Groenlandie e Sardegne, musiche dal vîf di Galizie, Isulis Foeroyar, Çukotke, Hakassie, Irlande e Bretagne, incuintris tematics e events speciâi. Tra chescj a son stâts ‘Scuele Europe’, lezion-conciert pai students des scuelis secondariis su la impuartance de diversitât linguistiche e culturâl, tant che patrimoni, dirit e oportunitât, e ‘Suns Doc‘, dedicât ae produzion enogastronomiche des minorancis.
Il Festival al è stât ancje une vetrine europeane pe produzion ‘Made in Friûl’. Dal gnûf romanç afrofurlan di Stiefin Morat, ‘Kebar Krossé’, ae leture di teatri de prime conte lungje di Morat, ‘Donald dal Tiliment’, par cure di Teatro Sosta Urbana, e di‘Int/Art’ di Dorino Minigutti e Giorgio Cantoni e di ‘Friûl Revolution’ di Marco D’Agostini e I Cjastrons a ‘Brez Mej’, il documentari par sloven di Giovanni Chiarot, al è saltât fûr in forme creative chel che al è il profîl multilengâl e multicultural dal Friûl.
Il grant finâl di sabide ai 3 di Dicembar
Dut chest al à cjatât la sô conclusion ideâl te serade sflandorose dai 3 di Dicembar. Sul palc dal Teatri gnûf “Giovanni da Udine”, plen di int, a àn presentât lis lôr lôr cjançons in concors il rapper cjargnel Doro Gjat, i irlandês Imlé, la cjantante de Çukotke, Veronika Usholik, il grup trip hop des isulis Faer Oer, Steso, la band galiziane Familia Caamagno, il rocker breton Brieg Guerveno, il performer siberian Gurude, il cornic Rory McGrath, la cjantautore frisone Norma e i Berdon, ladins de Val di Fasse. Il risultât al è stât une polifonie di lenghis, ritmis e stîi, un spetacul che si à zovât ancje de conduzion dai presentadôrs – la cubie furlane/slovene cun Renato Rinaldi e Karolina Cernic – e dal live painting di Cosimo Miorelli, autôr ancje de grafiche dal manifest di Suns Europe, che sul schermi daûr dal palc al à inricjît in tiermins visîfs dutis lis esibizions.
And the winners are…
Ae fin des cjançons, al public e ae jurie tecniche ur à tocjât il compit di decidi i vincidôrs dal concors musicâl. Par vie dal nivel une vore alt des propuestis, le àn vude avionde grivie. Ae fin la jurie dai esperts ur à dât il premi ai Steso, cul lôr trip hop inmagant, intant che il vôt popolâr al à premiât la vôs di aur di Veronika Usholik e ur à dât chei altris doi puescj a Gurude e ai Berdon.
Cun di plui e je stade fate la premiazion ancje par chês altre sezions di Suns Europe: pal cine il ricognossiment al è lât al documentari groenlandês ‘Sume – Mumisitsinerup Nipaa’ di Inuk Silis Hoegh, che al conte cun snait la esperience de prime rock band in lenghe inuit, i Sume, leade cun chê des rivendicazions culturâls e politichis de int di chê grande isule, e pe leterature al è stât premiât Xavi Sarrià, pe sô ativitât di autôr in lenghe catalane.