Dulà: Rock Club 60
Cuant: 30/11
Orari 23:00
Gwenllian Anthony, Hollie Singer e Heledd Owen a son trê fantatis di Carmarthen, che a sunin e che a cjantin par galês cun snait e cun personalitât. Il lôr grup si clame Adwaith e tal 2016 si à fat preseâ une vore, ator pal Gales e ancje inaltrò tal Ream Unît, cul so singul di debut ‘Pwysau’. Di in chê volte a àn zirât ator un grum tai festivals, par radio e par television, e a àn spartît il palc ancje cun Gwenno, Serol Serol e Patricia Morgan dai Datblygu. La lôr musiche e je une misture di sugjestions post punk, pop e folk, cun struturis semplicis insioradis dai ricams des ghitaris e cun melodiis scalembris che si jemplin di soul cu lis vôs in biele evidence. Une gnove conferme de vivarositât de produzion musicâl contemporanie par galês.