In spiete dai events de Sierade, e torne a tacà la tournée estive dal festival des arts intes lenghis minorizadis di Europe
FRIÛL – Il calendari al cjaparà dentri cetancj apontaments e si sierarà in Otubar. Par cumò, dut câs, i organizadôrs di Suns Europe – festival des arts intes lenghis minorizadis di Europe, in program a Udin e in altris bandis dal Friûl – a àn decidût di pandi dome lis primis datis dal calendari cetant siôr di concierts di “Suns Europe Istât”, che al darà une scjassade al Istât in Friûl.
MARTINA IORI – Si tacarà ai 24 di Jugn, a 9 di sere, a Muçane, intal parc dai Vuarps, cuntun apontament che al viodarà montâ parsore dal palc la ladine Martina Iori. Violiste classiche vie pal dì e cjantautore vie pe gnot, Martina e fevele e e cjante par ladin, la sô lenghe mari. Vincidore di Suns intal 2014, si le pues cognossi a colp parcè che e rint plui bielis lis sôs lidrîs cun cure e finece musicâl, intun miscliç cjantautoriâl, pop e jazz, sunant cun artiscj di ecezion, tant che Matteo Cuzzolin, Matteo Rossetto, Marco Stagni e Enrico Tommasini. L’apontament al è organizât in colaborazion cu la Aministrazion comunâl di Muçane.
CÛR DI VERI – Ai 25 di Jugn, a 5 e un cuart daspò misdì, te suaze di “Fevelis, festival di lenghis antighis e di musiche moderne”, in program alì dal Cjastelîr di Merêt (in localitât Savalons), si fasarà un secont conciert targât “Suns Europe Istât”, chel dai “Cûr di veri”. Il tercet al puartarà in sene lis musichis dal polistrumentist e rangjadôr Leo Virgili, cu la interpretazion de zovine Nicole Coceancig, une des vôs plui ispiradis e plenis di energjie dai ultins agns in Friûl. A sierâ la formazion, il virtuosisim e la sensibilitât dal violinist Davide Raciti. Un tercet bon di viazâ di là dal ocean, messedant lis melodiis tipichis de musiche furlane cul imagjinari tragjic e fat di amôrs cruziâts e svindics cruents tipics dal tango argjentin. Cûr di Veri al torne a lei i repertoris popolârs dal Friûl e de Americhe dal Sud e al zonte ancje une grampe di composizions origjinâls cun rangjaments plens di energjie, cjapant il larc propit come intune emigrazion par ledrôs. Il conciert al nas de colaborazion tra Suns Europe e Fevelis, cun chê di rinfuarçâ i leams tra il festival e altris realtâts culturâls dal Friûl.
VIE PAR CHEI ALTRIS MÊS ESTÎFS – La tournée di “Suns Europe Istât” e larà indevant vie pai mês di Lui, Avost e Setembar e e rivarà insom, juste apont, inte programazion autunâl (tradizionâl) di Suns Europe che si sierarà vie pe metât di Otubar cul concierton finâl intal Teatri Gnûf “Giovanni da Udine”.
IL FESTIVAL – La rassegne – organizade ogni an de cooperative Informazione Friulana, editore di Radio Onde Furlane, cu la poie finanziarie dal Ministeri de Culture, de Regjon Autonome Friûl Vignesie Julie e de ARLeF – Agjenzie Regjonâl pe Lenghe Furlane e cu la colaborazion di cetancj sogjets publics e privâts – e à il merit di tramudâ il Friûl intune crosere di lenghis, culturis e artiscj, creant une ocasion uniche di visibilitât par produzions artistichis di alte cualitât ma che masse dispès a faturin a rivâ al grant public.
Dutis lis informazions si lis pues cjatâ intal sît www.sunseurope.com, te pagjine Facebook ‘SUNS Europe’ e tal profîl Instagram.
Ufficio stampa “Suns Europe”: Eleonora Cuberli | 340.3546890 | press.cuberli@gmail.com |