Par partecipâ si à di notâsi sul modul in linie dentri dai 30 di Avrîl

UDIN – Al è timp fint ai 30 di Avrîl dal 2024 par candidâsi par Suns Europe: il festival des arts intes lenghis minorizadis de Europe inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl – Vignesie Julie e de ARLeF – Agjenzie Regjonâl pe Lenghe Furlane, e cu la colaborazion di diviers sogjets publics e privâts, di chenti e internazionâi. Il Festival, che chest an al finìs 10 agns, si davuelzarà a Udin e in altris lûcs dal Friûl vie pal mês di Otubar.

MUSICHE INOVATIVE – Il bant al è centrât su la sezion musicâl de manifestazion e si indrece a grups e musiciscj che la lôr produzion artistiche e je fate intune des lenghis espression des comunitâts minorizadis de Europe, daûr de definizion che si cjate intal articul 1 de Cjarte europeane des lenghis regjonâls o minoritariis. Il festival al à chê di dâi evidence aes propuestis calcoladis lis plui origjinâls e inovativis.

LA SELEZION – Par candidâsi, dentri dai 30 di Avrîl dal 2024, i artiscj a àn di compilâ il modul che al è te sezion di pueste dal sît www.sunseurope.com compagnantlu cui materiâi domandâts. La selezion e sarà fate po dai organizadôrs dentri dai 30 di Mai dal 2024 e comunicade a cui che al à partecipât par pueste eletroniche.

A UDIN, IN OTUBAR – I artiscj selezionâts a saran invidâts a partecipâ al festival par sunâ dal vîf lis lôr cjançons intant de serade finâl dal festival che si davuelzarà vie pal mês di Otubar dal 2024 a Udin. Dut câs la organizazion e cirarà di dâi ai artiscj la pussibilitât di presentâ la lôr produzion musicâl ancje in altris moments de manifestazion.

INFORMAZIONS – Par sclariments, informazions o altri, si pues scrivi a info@sunseurope.com

The post Suns Europe al cîr musiciscj pe edizion gnove appeared first on Suns Europe.

Dania O. Tausen e vinç de unanimitât (di public e di jurie) – Suns Europe 2023

La jurie popolâr e chê tecniche a son stâts in cunvigne sul non de faroese che si è esibide inte suaze maraveose dal Teatri Gnûf “Giovanni da Udine”

UDIN – Dania O. Tausen (isulis Føroyar) e à vinçût di unanimitât (di public e di jurie) la none edizion di Suns Europe (dai 24 di Jugn ai 28 di Otubar dal 2023), il festival des arts in lenghe minorizade organizât de cooperative Informazione Friulana, editore di Radio Onde Furlane, cu la poie finanziarie dal MiC – Ministeri de Culture, de Regjon Autonome Friûl-Vignesie Julie e de ARLeF – Agjenzie regjonâl pe lenghe furlane, in colaborazion cun cetancj altris sogjets publics e privâts. Lis  misteriosis isulis Føroyar a son il centri dal mont par cheste artiste che e passe di un continui de musiche ae poesie. Tes cjançons di Dania O. Tausen lis storiutis di ducj i dîs a deventin la scuse par jentrâ intal mont di une artiste che, daûr di une scusse pop, soul e rock, e fature a stratignî l’amôr pe sô lenghe e pe sô tradizion popolâr. Il concierton si è davuelt sabide ai 14 di Otubar dal 2023, te suaze maraveose dal Teatri Gnûf “Giovanni da Udine”.

I PREMIS – «Pe biele vôs e par cemût che e à interpretade la sô tiere. Par jessi rivade a trasmeti al public la magjie des isulis Føroyar. E ancje pal nivel alt dai musiciscj che a àn dât fuarce e valôr ae sô interpretazion ». Cun chestis peraulis la jurie tecniche internazionâl e à decretade vincidore Dania O.Tausen. A dâ fûr il premi, Lorenzo Zanon, component dal Comitât tecnic e sientific cun funzion ancje di President de ARLeF – Agjenzie Regjonâl pe Lenghe Furlane, adun cul assessôr ae culture dal Comun di Udin, Federico Pirone.
Ma prime ancjemò, a incoronâle vincidore al è stât il public dal Teatron  adun cun chel internazionâl che al à vude la pussibilitât di votâ di cjase scoltant la direte radio in streaming. A jê, duncje i va ancje il “premi Guglielmo Tonelli” consegnât di Cristina Perusin, mari dal zovin musicist muart masse adore, intal 2021, e che i organizadôrs a àn decidût di dedicâi il ricognossiment.

Il tierç premi, Altris Europis, al è invezit lât al Babel Film Festival, e consegnât a Paolo Carboni, regjist, membri de associazion Babel e diretôr artistic dal Festival, cun cheste motivazion: «Dal 2010, al rapresente un pont di riferiment pal cine des minorancis, linguistichis e no dome. Al è une vetrine des produzions cinematografichis che a doprin lenghis e lengaç che a tegnin bot ae omologazion che e parone i nestris dîs. Cun di plui, al è un lûc di incuintri e di confront creatîf par artiscj e professioniscj dal setôr e ancje une ocasion par rivendicâ i dirits des comunitâts minorizadis, ancje di là dai confins dal nestri continent. il Premi Altris Europis 2023 i va duncje al Babel Film Festival di Casteddu / Cagliari».

GRUPS – Chê lade in sene al “Nuovo” e je stade une serade divertente e plene di colôr. I artiscj i àn metût passion e entusiasim e si son esibîts te lôr lenghe mari. Presentâts di Michele Polo e Marianna Tonelli, parsore dal palc si son esibîts, in plui de vincidore za nomenade, ancje i Mishima (Catalogne), Ødei (Paîs Basc), Lisa Harms (Basse Sassonie), Chroma (Gales), Devid Strussiat (Friûl).

Ferbint Leo Virgili, diretôr artistic dal event, che al à comentât a cjalt l’event: «E je stade une serade plene di emozions; cjamade di tantis robis bielis. Ma a son stadis bielonis ancje lis zornadis prime dal conciert, li che i artiscj a àn vude la pussibilitât di cognossisi, di creâ une rêt e leam. O soi content che e vedi vinçût Dania O. Tausen, une artiste zovine, di no crodi. In gjenerâl, o soi content di cemût che al è lât il spetacul. La presince sul palc di Marianna Tonelli e je stade impuartante. E je une fantate zovine, che e rive di Radio Onde Furlane, e e à dimostrade une grande professionalitât e ancje trancuilitât intal frontâ un palc cussì impuartant come chel dal Teatri Gnûf “Giovanni da Udine”. O crôt che al sedi un dai risultâts plui biei di cheste edizion ».

Sodisfat ancje Carli Pup, president de cooperative Informazione Friulana, societât editore di Radio Onde Furlane, che e organize l’event: «O sin une vore contents par cemût che e je lade cheste edizion dal Festival Suns Europe. Une edizion che si à sierade, o pensi che si puedi propite dîlu, “cul bot”. Cuntun concierton che o crodìn che al vedi rispuindût a ce che il public al voleve. Cuntune cualitât artistiche alte ma, soredut, cuntune cualitât umane alte e cu la pussibilitât di fâ pardabon ce che i tignìn di plui: meti adun, tiessi leams, fâ cognossi culturis, lenghis e comunitâts diferentis e, tal stes timp, marcâ il dirit a doprâ ad in plen lis nestris lenghis e a jessi ce che o sin, in mût combatîf ma simpri legri».

L’EVENT CHE AL SIERARÀ LA EDIZION 2023 – L’ultin apontament cun Suns Europe 2023 si fasarà a Codroip ai 28 di Otubar aes 9 di sere. Il musicist Devid Strussiat, daspò di vê rapresentât il Friûl intal concierton, ai 14 di Otubar, si esibirà ancje vie pes premiazions de 44^me edizion dal San Simon, il concors plui impuartant pe leterature in lenghe furlane, organizât dal Comun di Codroip.

SUNS EUROPE – Suns Europe (di Jugn fin Otubar dal 2023) al è il festival european des arts performativis intes lenghis minorizadis (tiermin par marcâ lis lenghis che ur ven dineade la pussibilitât di jessi dopradis in maniere normâl e te stesse maniere di altris in ducj i ambients de vite di ogni dì). SUNS Europe al è il festival european des arts in lenghe minorizade. Nassût intal 2009 in Friûl, cûr multilengâl di Europe, Suns al jere un concors musicâl pes comunitâts minorizadis de aree alpine e mediteranie; po dopo il festival si è tramudât in Suns Europe, un lûc di incuintri e di confront tra artiscj di grups linguistics minorizâts dal continent e ancje une ocasion par dutis lis comunitâts europeanis par cjapâ cussience dai lôr dirits linguistics e de impuartance dal pluralisim culturâl tant che patrimoni, dirit e oportunitât par ducj, in Friûl e no dome.Il Festival al è organizât de cooperative Informazione Friulana, editore di Radio Onde Furlane cu la poie finanziarie dal MiC – Ministeri de Culture, de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, in colaborazion cun cetancj sogjets public e privâts, tant che l’Istitût Basc Etxepare, i Comuns di Udin, Codroip, Mortean, Murùs, Muçane, Romans dal Lusinç e San Vît dal Tiliment, il Teatri Stabil Furlan, lis associazions Stichting REUR (Basse Sassonie), Babel (Sardegne), Inniò, Amîs da Mont Quarine, Liberatori di Art “Fulvio Zonch”, e i circui ARCI CRAL di San Vît dal Tiliment e Cas*Aupa di Udin. Suns Europe al à il merit di tramudâ il Friûl intune crosere di culturis, lenghis e artiscj, di mût di dâ vite a contaminazion e confront e di dâi spazi a une produzion artistiche di grant valôr.

IINFO – www.sunseurope.com |  Facebook | Instagram |

The post Dania O. Tausen e vinç de unanimitât (di public e di jurie) Suns Europe 2023 appeared first on Suns Europe.

Viertis lis prevenditis in linie pal concierton di Suns Europe!

A sin disponibii i biliets pe serade-event in program par chest an par sabide ai 14 di Otubar, des 9 di sere, tant che ogni an inte suaze maraveose dal Teatri Gnûf Giovanni da Udine

UDIN – In spiete di scuvierzi i detais dal program gnûf di Suns Europe 2023, il festival des arts intes lenghis minorizadis organizât de cooperative Informazione Friulana, editore di Radio Onde Furlane – cu la poie finanziarie dal MiC – Ministeri de Culture, de Regjon Autonome Friûl-Vignesie Julie e de ARLeF – Agjenzie regjonâl pe lenghe furlane, in colaborazion cun cetancj altris sogjets publics e privâts –, a tacâ di vuê, ai 29 di Setembar dal 2023, aes 4 daspò misdì, e scomence la prevendite in linie dai biliets (10 euros) pal moment plui spietât, ven a stâi pal concierton finâl, in program par sabide ai 14 di Otubar, a tacâ des 9 di sere, intal Teatri Gnûf Giovanni da Udine. I biliets si ju podarà comprâ intal sît www.vivaticket.it e intes rivenditis autorizadis Vivaticket in plui che alì de bilietarie dal Teatri Gnûf Giovanni da Udine (di martars fin sabide des 4 daspò misdì aes 7 di sere, a tacâ dai 10 di Otubar).

SUNS EUROPE – Suns Europe (di Jugn fin Otubar dal 2023) al è il festival european des arts performativis intes lenghis minorizadis (tiermin par marcâ lis lenghis che ur ven dineade la pussibilitât di jessi dopradis in maniere normâl e te stesse maniere di altris in ducj i ambients de vite di ogni dì). SUNS Europe al è il festival european des arts in lenghe minorizade.

Nassût intal 2009 in Friûl, cûr multilengâl di Europe, Suns al jere un concors musicâl pes comunitâts minorizadis de aree alpine e mediteranie; po dopo il festival si è tramudât in Suns Europe, un lûc di incuintri e di confront tra artiscj di grups linguistics minorizâts dal continent e ancje une ocasion par dutis lis comunitâts europeanis par cjapâ cussience dai lôr dirits linguistics e de impuartance dal pluralisim culturâl tant che patrimoni, dirit e oportunitât par ducj, in Friûl e no dome.

Il Festival al è organizât de cooperative Informazione Friulana, editore di Radio Onde Furlane cu la poie finanziarie dal MiC – Ministeri de Culture, de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, in colaborazion cun cetancj sogjets public e privâts, tant che l’Istitût Basc Etxepare, i Comuns di Udin, Codroip, Mortean, Murùs, Muçane, Romans dal Lusinç e San Vît dal Tiliment, il Teatri Stabil Furlan, lis associazions Stichting REUR (Basse Sassonie), Babel (Sardegne), Inniò, Amîs da Mont Quarine, Liberatori di Art “Fulvio Zonch”, e i circui ARCI CRAL di San Vît dal Tiliment e Cas*Aupa di Udin. Suns Europe al à il merit di tramudâ il Friûl intune crosere di culturis, lenghis e artiscj, di mût di dâ vite a contaminazion e confront e di dâi spazi a une produzion artistiche di grant valôr.

INFO – www.sunseurope.com |  Facebook | Instagram |

The post Viertis lis prevenditis in linie pal concierton di Suns Europe! appeared first on Suns Europe.

The post Plui lenghis, plui culture, plui Europe appeared first on Suns Europe.

The post Serie VR 33/16 appeared first on Suns Europe.

The post HMS Morris appeared first on Suns Europe.

The post Olatz Salvador appeared first on Suns Europe.

The post Massimo Silverio appeared first on Suns Europe.

The post Violoncelli Itineranti appeared first on Suns Europe.

The post Rick Hilberts appeared first on Suns Europe.