Vinars ai 2 di Otubar a 21:00
Cantine "Gradnik", Plessive, Cormons
Jentrade libare
Michela Franceschina
Musiciste e insegnante di formazion, e cure cun snait e origjinalitât il cjant, la direzion corâl e la composizion. Dal debut come cjantautore cun "Burattini Erranti" e je passade, ancje cun diviers lavôrs pai fruts in lenghe furlane, ae sperimentazion dal EP "Loop", fint al so ultin progjet "Kinship beat", dedicât ae fuarce dai leams e al ritmi vitâl che ju ten unîts.
Su Dotori
il casteddaju Michele Atzori – cognossût come Su Dotori o Dr. Drer – al puarte sul palc passe trente agns di rap sart militant, chel nassût intal 1991 cui CRC Posse: hip hop, black music, rock e reggae che si misturin cun launeddas e tradizion isolane, al servizi di tescj di impegn politic e pe autodeterminazion. I siei albums e agnorums di concierts in Sardegne, Italie e Europe a contin un percors di ricercje che nol smet di lâ indenant.
Ladies’ Juke-box
Nassût dal incuintri tra la vôs di Eva Tomat e la ghitare di Anna Cainero, chest progjet folk rock furlan si complete cu la armoniche e l’oboe di Nicola Zampis e il bas di Daniele Rosi. Il lôr gnûf concept album al conte il viaç come mudament e introspezion movintsi tra furlan, galizian, talian e inglês, tra cjantautorât, rock progressîf e sperimentazion. Regjistrât dal vîf su nastri, il disc al rivendiche la imperfezion umane de musiche sunade in grup, cuintri di ogni standardizazion di sunôr e lenghe.
