Vinars ai 9 di Otubar a 21:00
Sale concierts "Ottagono", Codroip
Jentrade libare
Zeltia Irevire
Grup di Sant Jacum di Galizie che al inmaghe cuntun folk origjinâl segnât di bodhran, violin e bouzouki, che si incrosin cun synth e pedâi eletronics par curâ e fâ sflorî in prospetivis gnovis la tradizion popolâr e il patrimoni naturâl galizian. Il lôr cjantâ par galego si poie su tressaduris personâls, cualitât strumentâl e rangjaments che a dan a cui che al scolte nudriment par fâ viazâ la imagjinazion in lûcs là che i siums si fasin realtât.
Momi
Nassude a Udin, cressude in Friûl, vuê e vîf a Milan là che si à diplomade in cjant. Inte sô produzion, piano, corâls e bands a deventin i imprescj ideâi par contâ lis sôs lidrîs intune ricercje melodiche e sonore fûr dal ordenari. Momi si à fate notâ tes semifinâls di Musicultura là che e à vinçût il Premi Bianca D’Aponte pe miôr composizion.
RTZ Kolektiboa
Vignûts sù inte farie artistiche dal centri pai zovins Zizpa di Baiona, Oph, Frel e Petri a puartin sul palc la sgrimie di strade che ju à formâts, vuê intaiade in studi dai beats di DJ Wall. Sclets e mai sierâts intun regjistri sôl, cun “Eden” il coletîf si à viert a sunôrs plui variâts e distonants, in sospension tra “paradîs” e curtcircuit.
Gwen
Anime creative des Adwaith, grup galês che al à vinçût dôs voltis il Welsh Music Prize, e fondadore di FEMME, la prime rassegne dute la feminin de sene musicâl in lenghe galese, Gwen e debute cumò di soliste fondint eletroniche minimâl, ritmichis industrial ipnotichis e une scriture che e rivendiche il valôr de espressivitât de sô lenghe a pet di cui che a ‘ndi sbelee la poesie e la capacitât di sucès.