Chest an Suns Europe al sarà eletropop e rock&roll, ma ancje rap, indie rock, eletroniche. La serade di scree duncje e varà dut ce che al covente par cjapâus.
E partìs la tierce edizion di Suns Europe: fieste di benvignût al Rock Club 60!
UDIN – O sin pronts. La tierce edizion di Suns Europe – il Festival des Arts in lenghe minorizade – si invie. Si tache za la buinore dai 30 di Novembar, a 10, cun ‘Babêl Europe radio show’, il speciâl radiofonic di Radio Onde Furlane che i darà acet ai protagoniscj de manifestazion (in program, a Udin, fintremai i 2 di Dicembar).
Fieste di benvignût in program al Rock Club 60
Apontament di no pierdi chel de fieste di viertidure in program al Rock Club 60 di Pradaman (vie G. Marconi 24) di nûf e mieze di sere indenant (21.30): un moment di benvignût (cun jentrade libare) segnât de musiche post punk, pop e folk des Adwaith e di une des vôs plui innomenadis de sene hip hop dal Paîs Basc, La basu. Sul palc però no saran dome lôr. Cemût che si à za vût ocasion di dî, chest an Suns Europe al sarà eletropop e rock&roll, ma ancje rap, indie rock, eletroniche. La serade di scree duncje e varà dut ce che al covente par cjapâus.
Adwaith
Tal panorame de musiche contemporanie par galês al è saltât fûr, tal 2016, il grup des Adwaith, trê fantatis di Carmarthen che a sunin e che a cjantin cun snait e cun personalitât. La lôr musiche e je une misture di sugjestions post punk, pop e folk cuntune buine dose di soul, marcade dai ricams des ghitaris e des croseris des vôs.
La basu
Elena Caballero Villanueva (pe anagrafe) e je une des plui innomenadis vôs dal hip hop dal Paîs Basc. Une femine basche fuarte e cussiente che e incrose lis sôs rimis cui sunôrs, cui ritmis e cui lengaçs dal rap, dal soul, dal reggae, dal funk, dal rhythm’n’blues, dal rock, dal folk e fintremai dal flamenco.
Il Festival
Suns Europe al è un progjet inmaneât des cooperativis Informazione Friulana (editore di Radio Onde Furlane) e Puntozero cu la poie de ARLeF (Agjenzie Regjonâl pe Lenghe Furlane), de Regjon Friûl – Vignesie Julie, dal Comun di Udin e de Fondazion Friuli, cu la colaborazion de Fondazion Teatro Nuovo Giovanni da Udine, dal Babel Film Festival e cul patrocini dal Consei de Europe.