Vignûts sù inte farie artistiche dal centri pai zovins Zizpa di Baiona, Oph, Frel e Petri a puartin sul palc la sgrimie di strade che ju à formâts, vuê intaiade in studi dai beats di DJ Wall. Sclets e mai sierâts intun regjistri sôl, cun “Eden” il coletîf si à viert a sunôrs plui variâts e distonants, in sospension tra “paradîs” e curtcircuit.

Anime creative des Adwaith, grup galês che al à vinçût dôs voltis il Welsh Music Prize, e fondadore di FEMME, la prime rassegne dute la feminin de sene musicâl in lenghe galese, Gwen e debute cumò di soliste fondint eletroniche minimâl, ritmichis industrial ipnotichis e une scriture che e rivendiche il valôr de espressivitât de sô lenghe a pet di cui che a ‘ndi sbelee la poesie e la capacitât di sucès.

Nassude a Udin, cressude in Friûl, vuê e vîf a Milan là che si à diplomade in cjant. Inte sô produzion, piano, corâls e bands a deventin i imprescj ideâi par contâ lis sôs lidrîs intune ricercje melodiche e sonore fûr dal ordenari. Momi si à fate notâ tes semifinâls di Musicultura là che e à vinçût il Premi Bianca D’Aponte pe miôr composizion.

A son pardabon une vôs des Valadis dal Nadison dal dì di vuê, artiscj vêrs che a vivin in prime linie la bielece e il snait ma ancje la fature dal vivi ta chê tiere. Cun “Velika magija” a àn concuistât public e jurie dal Senjam Beneške Piesmi tal 2022. Une lenghe che, su lis lôr notis, e fevele massime aes gnovis gjenerazions, tra memorie, rinovament e un ritmi che no ti lasse restâ fer.

Plui che un cjantautôr, al è un “puartadôr di cjançons” che al conte un troi segnât di impegn civîl e sens di comunitât, e di une scriture buine di scjavaçâ lenghis e stîi diferents. Al svante colaborazions di gale cun poetis e regjiscj che lu àn fat ancje premiâ pe miôr bande sonore tal New York Film Festival dal 2023. Un artist profont che nol mole di cirî formis gnovis par contâ la sô Sardegne.

Grup di Sant Jacum di Galizie che al inmaghe cuntun folk origjinâl segnât di bodhran, violin e bouzouki, che si incrosin cun synth e pedâi eletronics par curâ e fâ sflorî in prospetivis gnovis la tradizion popolâr e il patrimoni naturâl galizian. Il lôr cjantâ par galego si poie su tressaduris personâls, cualitât strumentâl e rangjaments che a dan a cui che al scolte nudriment par fâ viazâ la imagjinazion in lûcs là che i siums si fasin realtât.

Chestis dôs musicistis a dan une definizion gnove al folk sperimentâl, Clàudia (vôs, sintetizadôr, pad eletronic) e Isabel (violin, piano, percussions) nus menin intun univiers di sunôrs unic, fi di un progjet concetuâl e multidissiplinâr cun colaborazions di gale cun Marina Herlop e Tarta Relena. L’album gnûf, dut autoprodusût, al è incancarât sul teme de estinzion cun evoluzions eletronichis e sperimentazions finis e un implant di concept album che al rive ai scoltadôrs plui ricercjâts ma ancje a cui che nol pues fâ di mancul di melodiis e vôs incantesemadis.