Dove:
Quando:
Franco Giordani al è un cjantautôr e polistrumentist che di passe vincjecinc agns al è implicât intune schirie di progjets, a tacâ des coverbands Klautans e Top Secret e dai grups Lollipop e Bottle of Smoke.
Un passaç impuartant tal so percors artistic al è chel de colaborazion cun Luigi Maieron. Cul cjantautôr cjargnel al sune la ghitare, il bouzouki, il mandolin e il banjo, in studi e dal vîf. In chel stes al invie il so gnûf percors creatîf solist che lu puarte a meti adun il so prin album, ‘Incuintretimp’, dât fûr de etichete Nota Music tal 2015 e selezionât tal grup dai finaliscj de ‘Targa Tenco’.
Cualchi setemane indaûr, simpri tal catalic de Nota, al è saltât fûr il so secont cd, ‘Truòisparìs’, un viaç di musiche e peraulis che al conte il Cjanâl da la Ciline, la sô int e lis sôs storiis. Cjançon di autôr par furlan cun lidrîs rock e folk une vore saldis.