Par partecipâ bisugne compilâ il modul in linie dentri dai 31 di Lui
UDIN – al è tacât il cont par ledrôs pe gnove edizion di Suns Europe e tant che ogni an ve culì il bant indreçât ai grups musicâi e ai autôrs che la lôr produzion artistiche e je intune lenghe minorizade di Europe. Ancje chest an, l’intindiment dal festival al è chel di valorizâ lis miôr produzions contemporaniis intes lenghis minorizadis, si che duncje ancje la selezion musicâl e darà visibilitât aes propuestis che a vignaran consideradis plui origjinâls e inovativis.
Pe edizion 2022 bisugne marcâ che la rassegne si davuelzarà in doi diviers moments. In Istât, dai 30 di Jugn ai 15 di Lui, al è in program un calendari siôr di apontaments che nus menarà a Dartigne, Murùs, Puçui, Lavarian, Romans dal Lusinç, Cormons, Vilalte e Udin. L’event finâl, invezit, si fasarà ae fin de Sierade, in Novembar.
Ducj i artiscj interessâts a podaran notâsi, dentri dai 31 di Lui dal 2022, compilant il modul in linie che si pues cjatâ inte sezion di pueste dal sît uficiâl dal event (www.sunseurope.com/form-call-2022). A vignaran ametudis dome composizions origjinâls, sielzudis dal comitât artistic di Suns Europe, che sul lôr judizi no si pues fâi cuintri.
I finaliscj selezionâts a vignaran invidâts inte capitâl furlane par sunâ dal vîf vie pe zornade finâl dal festival, in program pai 26 di Novembar dal 2022.
La rassegne – organizade ogni an de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie e de ARLeF – Agjenzie Regjonâl pe Lenghe Furlane e cu la colaborazion di cetancj altris sogjets
Ufficio stampa Suns Europe | Eleonora Cuberli – 3403546890 | Alessandro Cesare – 3483731430 | pressunseurope@gmail.com