I Vincidôrs di Suns Europe 2018

La electroverse dai Jansky e vinç la edizion 2018 di Suns Europe

Il public al premie Martina Iori. Assegnât un ricognossiment al regjist basc Altuna

UDIN – La musiche eletroniche o, miôr, la electroverse dai Jansky, grup che al rive dai Paîs Catalans, e vinç la edizion 2018 di Suns Europe, il Festival des lenghis minorizadis che sabide al à vût la sô serade culminante tal Teatri Gnûf Giovanni da Udine.

 

I VINCIDÔRS – La jurie tecniche e à volût premiâ i doi fantats che a rivin de isule di Mallorca “pe origjinalitât e pe capacitât di meti adun poesie e inovazion”. I Jansky a son stâts premiâts di Sabrina Rasom, vicepresidente dal NPLD (Network to Promote Linguistic Diversity).  Une esibizion che e à trasformât il Teatron intune discoteche, cun ritmis eletronics miscliçâts in maniere savinte cul flaut di Jaume e la vôs di Laia. La medaie di arint e je lade ai Yr Ods dal Gales, esponents de sene indie rock, e chê di bronç a Martina Iori de Val di Fasse. Propit jê, espression de minorance ladine, e je stade la preferide dal public presint te sale (che al à implenât il teatri, a dimostrazion di trop che la musiche des lenghis minorizadis e rapresenti un riclam pe citât di Udin e no dome). A consegnâi il premi, il sindic di Udin Pietro Fontanini che al à marcât cemût che il sucès de serade finâl di Suns Europe al vedi permetût di «sunâlis par ben a cui che ancjemò nol crôt tes lenghis regjonâls». «Cheste esperience che Radio Onde Furlane e puarte indevant par fâ cognossi culì in Friûl la realtât des musichis regjonâls che a esistin te nestre Europe – al à sclarît il prin citadin – e je un fat biel che al à di lâ indenant ».

 

GRUPS – Une serade divertente e vivarose chê lade in sene al Giovanni da Udine, cui grups sul palc che a àn metût dute la lôr passion e dut il lôr morbin tes esibizion tes lôr lenghis mari. Si son dâts la volte i Luna e un Quarto dal Friûl, i Dario Hess dal Laura Hoo de minorance svedese de Finlande, Espiño de Galizie, Rodeo dal Paîs Basc, Melissa Meewisse de Basse Sassonie.

«La serade e je stade maraveose, il nivel musicâl al jere come simpri cetant alt – al à comentât Leo Virgili, diretôr artistic dal event –. No vuei dâ un judizi artistic sul vincidôr, ma o ten a sotlineâ che ducj i partecipants a son rivâts a capî ad implen il spirt di Suns Europe, che al è chel des relazions, dal confront, de condivision».

 

PREMI SPECIÂL – Vie pe serade, inmaneade de cooperative Informazion Furlane cul jutori finanziari de ARLeF – Agjenzie Regjonâl pe Lenghe Furlane, de Regjon Autonome Friûl – Vignesie Julie, dal Comun di Udin e de Fondazion Friûl, al è stât consegnât un ricognossiment speciâl al regjist Asier Altuna. Al è stât il diretôr de ARLeF, Wiliam Cisilino, a consegnâ il premi a une persone che di 25 agns e lavore tal cjamp dal audiovisîf e dal cine, contant il mont basc cun fuarce comunicative, abilitât e origjinalitât. «Al è biel viodi cemût che chest Festival al sedi daûr a lâ simpri plui lontan, svicinantsi al concet di Europe tant che patrie che o vin ducj tal cûr», al à dit Cisilino. Suns Europe al à dimostrât ancjemò une volte cemût che la musiche e rivi a unî cuntun lengaç comun personis une vore diferentis fra di lôr, che dut câs a àn in comun la voie di esprimisi tes lenghis dal lôr teritori in maniere moderne, gnove e dal sigûr apassionante.

 

IL REST DAL PROGRAM – Suns Europe al larà indenant domenie ai 2 di Dicembar. La zornade, siore di apontaments, si davuelzarà dute tal Teatri Sant Zorç di Udin, là che aes 2.30 dal dopomisdì si tacarà cun ‘Docu-storiis’. Stefano Giacomuzzi (Pozzis-Samarcanda), Dorino Minigutti (Int/Art) e Marco D’Agostini (Emigrant) a presentaran, in anteprime, lis lôr oparis. Aes 4 al sarà il moment de presentazion di ‘Km 100’, documentari visionari là che la regjiste Francesca Valentini (presinte ae proiezion) e descrîf Aleria, un lûc di avigniments storics intune Corsiche in mudament. Dopo dal intervent di Maria Xinxó, gjornaliste catalane che e contarà alc sul so gnûf libri su la indipendence de sô tiere, aes 6 e sarà ancjemò timp di cines, ma cheste volte o larìn tal Paîs Basc cun ‘Amama’, un luncmetraç pluripremiât dal regjist Asier Altuna. Po dopo, e sarà un pocje di musiche dal vîf. Il festival si sierarà (aes 9) cul spetacul teatrâl, targât TSU – Teatro Sosta Urbana, ‘Donald dal Tiliment’.

 

IL FESTIVALSuns Europe al è un progjet inmaneât de cooperative Informazion Furlane cu la poie finanziarie de ARLeF – Agjenzie Regjonâl pe Lenghe Furlane, de Regjon Autonome Friûl – Vignesie Julie, dal Comun di Udin, de Fondazione Friuli e dal istitût basc Etxepare, in colaborazion cu la cooperative PuntoZero e altris sogjets publics e privâts, furlans e internazionâi, cul patrocini dal Consei di Europe e dal NPLD – Network to Promote Linguistic Diversity, la rêt europeane pe promozion de diversitât linguistiche.

 

Dut il program e lis informazions a son su www.sunseurope.com e su la pagjine Facebook ‘SUNS Europe’.