Dulà: Rock Club 60
Cuant: 30/11
Orari 22:00
La Basu – pe anagrafe Elena Caballero Villanueva – e je une des plui innomenadis vôs dal hip hop dal Paîs Basc. E je ative de fin dai agns Novante dal secul stât, e vie par dut chest timp e à incrosât lis sôs rimis par basc e par spagnûl cui sunôrs, cui ritmis e cui lengaçs dal rap, dal soul, dal reggae, dal funk, dal rhythm’n’blues, dal rock, dal folk e fintremai dal flamenco. La Basu dispès si da dongje cun altris cjantants, cjantantis e musiciscj de sô tiere, par progjets musicâi e no dome par chei. In particolâr, dongje cun Aneguria, che e je une altre rapper di Bilbao une vore cognossude des sôs bandis, e à metût adun il progjet ‘Eskina Femenina’ cun chê di sapontâ lis fantatis che a disvilupin la culture hip hop in Euskal Herria: rappers, djs, grafitaris e balarinis di breakdance. L’an passât al è saltât fûr il so disc plui resint, ‘Izotz Erregina’. La sô vôs si cjate ancje tal disc basc/catalan/babelic di Fermin Muguruza & Chalart58, ‘Black is Beltza ASM Sessions’. Une femine basche fuarte e cussiente.