NIÑA COYOTE ETA CHICO TORNADO + BAKAN

Sabide 12 otubar, 21:00
Cral Arci Ciliti, San Vît al Tiliment (PN)
Jentrade libare

NIÑA COYOTE ETA CHICO TORNADO (Paîs Basc)
Don Condor eta Ñora Alacran a son l’alter ego di Niña Coyote eta Chico Tornado, cubie innomenade pal so rock ‘n’ roll ruspiôs e cence compromès. Intant di une tape dal lôr tour mondiâl dal 2017, inceâts dai paisaçs dal desert messican di Rumorosa, a àn decidût di meti sù un progjet laterâl sugjestionât de cumbia e dal surf plui scûr. Tal 2022 a àn publicât un album di cjançons straordenariis che a strissin spandint il tuessin inzingarant di un madrac dal desert.

BAKAN (Friûl)
Cui lôr passe trente agns di ativitât, i Bakan a son un dai grups de Gnove Musiche Furlane cuntune vite plui lungje… Il cuartet di Glemone al met adun la influence e l’atrat dai cjançonîrs dai agns ’70 ae sgrifade ruspiose dal rock di riunde inglese. Lis cjançons dai Bakan no pretindin di frontâ i grancj problemis dal mont ma a contin storiis scletis là che al ven facil di sintîsi protagoniscj. Dai volantins tacâts sui mûrs tai agns ’90 al bombardament su lis rêts sociâls di vuê, i Bakan a àn simpri evitât ogni sorte di retoriche e a àn rivât a restâ sclets e a mantignî une integritât che ju rint unics e preziôs.