Ai 30 di Avost il concierton in Cjistiel a UdinSuns Europe mai cussì zovin e al feminin!Al torne in Friûl, dopo de emergjence Covid-19, il festival che al met adun lenghis cuntunestorie antighe e formis di comunicazion dal dì di vuê
Cualchi mês prime dal solit si fâs indenant la seste edizion di Suns Europe, inmaneât de cooperative Informazione Friulana, editore di Radio Onde Furlane.Il festival des arts in lenghe minorizade al torne, dopo de emergjence Covid-19, cuntun program che nol è mancul siôr di chel dai ultins agns ma ancje cun variis novitâts!
CONCIERTON – La prime e interesse propit il Concierton che, chest an, si davuelzarà alì dal Cjistiel di Udin ai 30 di Avost, a nûf di sere (21.00). Par rispietâ ad in plen lis regulis par fâi cuintri al Covid-19 i puescj a saran limitâts e, ancje se la jentrade e je sore nuie, si varà di prenotâ sul sît https://www.sunseurope.com/it/prenotazione dai 30 di Lui indenant).
La organizazion e à decidût di rimandâ al 2021 la part competitive dal festival ma chel istès, compagn che tes edizions stadis, sul palc si varan propuestis musicâls di grande cualitât. Par chest 2020 si à po di marcâ la impuartante presince feminine e ancje une etât medie dai artiscj che a sunaran sù in Cjistiel sui 30 agns. «Si sint a dî dispès che lis lenghis minoritariis a san di vecjo e di passât – a spieghin i organizadôrs – ma al è za diun pieç che cun Suns Europe o cirìn di sdrumâ chest mît cence fondis: lu fasìn cul puartâ in Friûl musiciscj che a sperimentin gjenars diviers e modernis. E po, chest an ancjemò di plui chei tai agns stâts, a son i fats a fevelâ: sul palc, di fat, a sunâ e a cjantâ te lôr lenghe proprie a saran soredut artiscj zovins plens di snait e di talent».
SUNS FRIÛL – Cundut des dificoltâts che a son sot dai voi di ducj, i organizadôrs, no cence un friç di matetât, no si son tirâts indaûr intal moment di meti dongje il program. Cussì si scomençarà za ai 22 di Avost in place Venerio a Udin cun Suns Friûl – vitrine dedicade aes gnovis produzions musicâls furlanis – par lâ indenant vie pal mês di Setembar cun diviers apontaments sparniçâts ator pal Friûl e fats sì di musiche, ma ancje di cine e di leterature tes e su lis lenghis minorizadis europeanis. Dut il program e lis informazions si ju cjate su www.sunseurope.com e su la pagjine Facebook ‘SUNS Europe’.