Suns Europe al torne intune gnove vieste estive

Dai 20 di Lui al 1n di Avost dal 2021

 

Dôs setemanis, par un totâl di cutuardis events in dut, disenûf ospits, in nûf Comuns dal Friûl: ve ca la setime edizion dal festival, che al torne in version estive e al propon di gnûf il concors musicâl

 

UDIN – Daspò dal sucès de edizion stade, Suns Europe – festival des arts in lenghe minorizade inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût Basc Etxepare e di cetancj sogjets publics e privâts, locâi e internazionâi – al torne intune version estive plene di morbin, in program in nûf Comuns dal Friûl (Cormons, Dartigne, Feagne, Lusevare, Mortean, Murùs, Puçui, Romans dal Lusinç, Udin). Protagoniscj dai cutuardis events in calendari (3 di cine, 2 di leterature e 9 di musiche), tra i 20 di Lui e il prin di Avost dal 2021, a saran disenûf ospits, che a rivin di Paîs Basc, Isulis Føroyar, Galizie, Cjanton dai Grisons, Ladinie anauniche, Ocitanie, Sardegne, in plui che dal Friûl. Il program intal detai de setime edizion al è stât presentât ai 7 di Lui inte suaze de conference stampe che si è davuelte inte sede de Regjon F-VJ, a Udin, ae presince di Pierpaolo Roberti, assessôr regjonâl cun deleghe aes lenghis minoritariis, Fabrizio Cigolot, assessôr ae culture dal Comun di Udin; Eros Cisilino, president di ARLeF – Agjenzie Regjonâl pe Lenghe Furlane; Carli Pup, president de cooperative Informazione Friulana e Leo Virgili, diretôr artistic dal Festival. «Par garantî la plui largje partecipazion dal public o vin decidût ancjemò une volte di proponi une version estive dal Festivalal à declarât Pup. Magari cussì no, sul plan organizatîf, lis dificoltâts a restin ancjemò tantis massime par cui che, come Suns Europe, si môf suntune dimension internazionâl. Chel istès o crodìn di vê rivât a meti adun une ufierte variade e di cualitât, cun propuestis in stât di valorizâ la sioretât che e compagne la diversitât linguistiche e culturâl dal nestri continent».
L’assessôr Roberti, intal fâur i compliments ai organizadôrs di Suns Europe, al à vût iniment che «Al è un festival internazionâl che al à la sô fonde in Friûl-Vignesie Julie, fat che nus jemple di braùre e i da lustri al nestri teritori; ancje midiant di chestis manifestazions, o valorizìn e o promovìn la nestre identitât. Intune Regjon come la nestre, che e fonde lis cundizions de autonomie su la peculiaritât des cuatri lenghis uficiâls che a vegnin feveladis sul teritori, no mancjarà, ancje pal avignî, la poie de Aministrazion regjonâl a chestis iniziativis. Cheste edizion, tant che l’an passât, e rive intun moment di dificoltât, massime par cui che al fâs spetacul e al à scugnût stâ fer par une lungje dade di timp – al à sierât Roberti -; e duncje e rapresente un auguri par ripartî ma ancje par viodi a colâ, si spere in curt, ancje lis ultimis restrizions e tornâ ae normalitât».
«Se za inte edizion passade al è stât une vore impuartant lâ indevant cu la calendarizazion dal Festival, che ARLeF al è so sponsor principâl, chest an lu è ancjemò di plui – al à precisât il president de ARLeF, Eros Cisilino -. La cjame emotive, economiche e sociâl de pandemie e je stade grivie e vuê, tant che mai, bisugne taiâsi fûr moments di normalitât, fats di socialitât e di culture. La musiche, la leterature e lis propuestis cinematografichis di Suns Europe a son propit chest. Ancje intal 2021, o noti cun plasê che il cartelon dal festival al è cetant siôr, che si è tornâts ae competizion musicâl e che in Friûl a rivaran zovins di tantis bandis di Europe. Chest al è un segnâl di vivarositât une vore biel. Par dôs setemanis, la nestre tiere e sarà ancjemò une volte pont di incuintri e di confront tra i popui e puartebandiere dai valôrs dal plurilinguisim, dant acet a feminis e a oms che nus fasaran cognossi la lôr identitât, culturâl e linguistiche, traviers dai lengaçs plui modernis. O calcoli che, intun moment storic come chel che o sin daûr a vivi, il leam cu lis propriis lidrîs e cu la lenghe mari al sedi daûr a rinfuarçâsi. Lis dificoltâts che o sin daûr a traviersâ di cuasi doi agns a àn insaldade la dibisugne di ricognossisi inte comunitât che si aparten e intai siei valôrs».
«Cheste Aministrazion e je impegnade di simpri inte valorizazion no dome dal furlan ma di dutis lis lenghis minoritariis presintis a nivel european. E dentri dal agâr di cheste atenzion si cjate la poie sigure che ogni an il Comun i da al Festival Suns Europe – al à precisât l’assessôr Cigolot -. No podìn duncje che jessi braurôs dal fat che al sedi propit Udin, Capitâl dal Friûl e dal furlan, che e je la lenghe minoritarie plui feveladis dal Paîs, la sede principâl di chest avigniment impuartant e bon di clamâ dongje, midiant dal lengaç universâl de musiche, lis fevelis locâls e cun plui rimarc di Europe».

 

LA MISSION DAL FESTIVAL – Se l’an passât – ancje cence gjavâi nuie ae atmosfere uniche dal Festival – si veve scugnût meti man in maniere ancje impuartante inte formule (sante scugne, viodude la emergjence!), chest an si fâs un piçul pas indaûr in direzion des origjins cul bant che al à permetût di selezionâ i musiciscj ospits e che, no cate lis dificoltâts dal moment, al à vude une partecipazion significative. Se e je une robe che no je cambiade, chê e je la mission de kermesse: ‘Dirit ae lenghe, dirit ae diversitât, che al vûl dî lavorâ par “promovi lis produzions artistichis contemporaniis intes lenghis minorizadis di Europe, cun chê di prudelâ la costruzion di une Europe diferente, unide intes diversitâts, fondade sui dirits, sul pluralisim, sul rispiet e su la colaborazion”.

 

LA GNOVE EDIZION – «Aben che la situazion presinte nus vedi imponude une fuarte riorganizazion intes ultimis dôs edizions, o sin stâts strissinâts dal entusiasim dai tancj artiscj europeans che, no cate lis dificoltâts dal ultin an e mieç, a son lâts indevant a produsi contignûts di grant valôr artistic. A son propit chescj artiscj che a domandin a plene vôs di tignî vîfs i spazis di espression tant che il nestri, confermant la dibisugne di un festival come Suns Europe. Tra lis novitâts che mi sint di segnalâ par cheste edizion, e je la presince di nuie di mancul che doi progjets che a rivin des Isulis Føroyar, in plui che (ma cheste no je une novitât) la presince feminine une vore grande inte plui part dai events che o presentarìn», al à ricuardât Leo Virgili dant i detais dal program, a tacâ dal Concierton di Suns Europe, che chest an al cole ai 31 di Lui, a 9 di sere, intal prât dal Cjistiel di Udin.

 

IL CONCIERTON DI SUNS EUROPE INTAL CJISTIEL – Une serade che no si spietisi, par vie che Suns Europe nol è un festival di folclôr, ma une kermesse zovine, vivarose, e che e olse simpri intes sôs propuestis artistichis. Si tacarà cul metalcore dai furlans Brût&Madone, che cu la lôr musiche a cjolin vie i lûcs comuns de e su la lôr tiere. Po dopo o varìn il sunôr di Daniela Pes, a miezis tra tradizion sarde, eletroniche e folk. La sô e je une des vôs plui origjinâls de musiche contemporanie de isule. Dal Paîs Basc, invezit, a rivin i Liher, un dai grups plui popolârs de sene musicâl in Euskal Herria. A tornin di gnûf a Suns Europe i sunôrs des Isulis Føroyar cui colôrs cjalts dal jazz nordic plui fin dai Land of Maybe che a àn debutât cul lôr prin album a pene 6 mês indaûr. Cun plasê, al torne ancje il Cjanton dai Grisons che intal 2021 al tornarà in Friûl cul pop di Ursina e cu lis sôs cjançons che a fevelin di sperancis bandonadis e di trop che al sedi biel e sante scugne pierdisi in lôr. A presentâ la serade a saran Patrick Platolino e Marianna Fernetich, nons che a son daûr a fâsi notâ tal panorame teatrâl furlan. Come simpri, e je in program ancje une direte radiofoniche de serade di 9 a 11 di sere, condusude di Mauro Missana di Radio Onde Furlane. Ancje chest an par vie de pandemie che no mole e de normative in vore, i puescj a saran limitâts, la jentrade e sarà sore nuie ma si scugnarà notâsi sul sît (https://www.sunseurope.com/fur/prenotazion/). Tal câs di brut timp, il conciert si fasarà intal Teatri Gnûf “Giovanni da Udine” li che però, par vie de capience, a podaran jentrâ dome lis primis 500 personis notadis.

 

SUNS FRIÛL – Confermade pal Istât 2021 ancje la serade di Suns Friûl, screade tal 2020 e che e je nassude par cjapâ sù la ereditât dal storic Premi Friûl di Radio Onde Furlane. Une farie che e à scuvierzût, promovût e produsût desenis di grups musicâi e di autôrs bogns di rinovâ a fonts la musiche furlane, a tacâ de metât dai agns Novante fin in dì di vuê. Mitili Flk, Lino Straulino, Arbe Garbe, Loris Vescovo, Carnicats e Doro Gjat, Luna e Un Quarto, Fabian Riz e dj Tubet a son dome cualchidun dai artiscj che in gracie dal Premi Friûl e de etichete Musiche Furlane Fuarte a àn dât il lôr contribût impuartant ae musiche, ma plui in gjenerâl ae creativitât artistiche in lenghe furlane e duncje a dute la culture furlane, massime par chel che al inten lis gnovis gjenerazions.
La serade-vetrine dedicade aes gnovis produzions musicâls furlanis di cumò e je in program ai 24 di Lui a 9 di sere in place Venerio a Udin. Il spetacul si fasarà ancje tal câs di brut timp, stant che il Comun al à decidût di indotâ il spazi cuntune tensostruture par parâ il public e il palc dal maltimp. Ma anìn daurman a viodi i protagoniscj. A cjalcjâ il palc a saran Cristian Mauro, bon di miscliçâ la cjançon di autôr furlane e chê americane. Po dopo o varìn il rock onest e sclet dal cuartet Trabeat, e ancje i Vididule Project, grup leât massime ae forme dal teatri cjançon, bon di misturâ diviers gjenars tant che il folk, il rock, il pop e il blues e segnât dal sun carateristic dal oboe. Cun lôr ancje la zovine Nicole Coceancig, une des vôs furlanis plui espressivis e ispiradis dai ultins agns. Ospits speciâi de serade, invezit, a saran i Ezpalak, un dai grups plui potents framieç de za grintose sene musicâl basche. Par rispietâ ad in plen lis regulis par contignî il Covid, i puescj a saran limitâts. La jentrade e je libare ma si scuen notâsi sul sît (https://www.sunseurope.com/fur/prenotazion).

 

CINE – Suns Europe 2021, dut câs, si screarà cul cine, in colaborazion cul CEC – Centro Espressioni Cinematografiche. E lu fasarà cuntun autôr za cognossût dal so public: Stefano Giacomuzzi che al presentarà il so “Pozzis Samarcanda” martars ai 20 di Lui, a 9 e mieze di sere, inte arene dal parc Loris Fortuna, in Zardin Grant, a Udin.
Il secont apontament cul cine (simpri in colaborazion cul CEC), al Visionario di Udin, al sarà chel cun “Bogre”, miercus ai 28 di Lui, a 8 di sere. Al sarà un viaç dentri de “grande eresie europeane”, chê dai Catars e dai Bogomii, che nus compagne par mieze Europe ae ricercje des relazions culturâls e religjosis jenfri chescj doi moviments. Pe ocasion al sarà presint il regjist e senegjatôr, Fredo Valla. Arlêf de scuele di Ermanno Olmi, al à vût colaborât cun Pupi Avati e Giorgio Diritti.
La dì dopo, a 8 e mieze di sere, al Visionario, e vignarà proietade, pe prime volte intal stât talian, la pelicule basche “Ane” – vincidore di trê Premis Goya e di tancj altris ricognossiments – che e fronte la complessitât dal rapuart tra gjenitôrs e fîs e, tal stes timp, lis tensions che a segnin la societât basche contemporanie. Dutis e trê lis proiezions a saran a paiament, informazions su http://visionario.movie/.

 

LETERATURE – Il Paîs Basc al sarà protagonist ancje di un dai apontaments di leterature in program ai 27 di Lui. A 6 sot sere, alì de librarie Tarantola di Udin, di fat, Cira Crespo, compagnade di Carli Pup, president de cooperative Informazione Friulana, e presentarà il so “Baginen. Euskal Herriko Historia Emakumeen Bitzartez”, stimât tant che un dai miôr libris in lenghe basche dal 2020. Il volum al conte lis vicendis di passe cincuante feminis che fin cumò a vevin vude pocje o nissune visibilitât, e al jude duncje a cognossi la storie basche di une prospetive divierse e, ancje par chest, inmò plui di atrat. 
A 9 de stesse sere, in place a Murùs (tal câs di brut timp intal auditorium “Riedo Puppo”), al è invezit in program un confront dedicât ae poesie dai trobadors e ae sô influence su lis leteraturis romanzis (“Ieu … que plor e vau cantan. Trobadors, i mestris ocitans di Dante”), che al varà par animadôrs Angelo Floramo, inteletuâl furlan che nol à bisugne di presentazions, e il ricercjadôr ocitan Andrea Giraudo. Al modere Marco Stolfo.

 

DUCJ CHEI ALTRIS CONCIERTS – Chês di Suns Europe 2021 a àn muse di jessi dôs setemanis di no pierdi! In plui dai za nomenâts Suns Friûl e dal conciert di Suns Europe, si tacarà za miercus ai 21 di Lui, a 9 di sere, a Romans dal Lusinç, cun Caamaño & Ameixeiras (Galizie). La dì dopo, ae stesse ore, (in colaborazion cu la Fieste dal Emigrant), l’apontament al è a Lusevare, cul conciert dopli cun Caamaño & Ameixeiras (Galizie) e Felix Lalù (Ladinie anauniche). Vinars ai 23 di Lui, inmò a 9 di sere, (in colaborazion cu la associazion Amîs da Mont Quarine), a Cormons a montâ sul palc a saran invezit Ezpalak (Paîs Basc) e Orko Trio cun Fabian Riz (Friûl). Domenie ai 25 di Lui, ae stesse ore, Drumlanduo (Friûl) e Dania O. Tausen (Isulis Føroyar) a saran i protagoniscj dal conciert dopli di Dartigne. Lunis ai 26 di Lui, ducj ae cort de Casa della Musica di Puçui, par scoltâ Dania O. Tausen (Isulis Føroyar). Vinars ai 30 di Lui, a 9 di sere, a Lavarian a saran i Land of Maybe (Isulis Føroyar) adun cun Daniela Pes (Sardegne). I tocjarà ai Liher (Paîs Basc) di sierâ Suns Europe inte suaze dal Festival Art Tal Ort di Feagne.

 

SUNS EUROPE – Il Festival des arts in lenghe minorizade al è inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e il jutori dal Istitût Basc Etxepare. Cun di plui, si zove de colaborazion di tancj sogjets publics e privâts, tant che i Comuns di Cormons, Dartigne, Feagne, Lusevare, Mortean, Murùs, Puçui e Romans dal Lusinç, il CEC Centro Espressioni Cinematografiche, la associazion Amîs de Mont Quarine, il Festival Art tal Ort, la Fieste dal Emigrant di Lusevare, la Societât Filarmoniche di Puçui, il Liberatorio d’Arte “Zonch” e lis associazions Babel (Sardegne), Lou Seriol (Ocitanie), Indian Runners (Paîs Catalans), La Grenz (Ladinie), Stichting REUR (Basse Sassonie), Il Cantiere e Inniò (Friûl). Suns Europe al à savût mudâ il Friûl intune crosere di culturis, lenghis e artiscj, creant contaminazions e confronts e dant spazi a di une produzion artistiche di dut valôr.

 

Dut il program e lis informazions a son su www.sunseurope.com e su la pagjne Facebook | Instagram |

 

IL PROGRAM INTAL DETAI:

 

(CINE)_ Martars ai 20 di Lui, a 9 e mieze di sere, (in colaborazion cun CEC)
inte Arene dal parc Loris Fortuna, intal Zardin Grant, Udin
Proiezion di Pozzis Samarcanda di Stefano Giacomuzzi (Friûl).

 

(MUSICHE)_ Miercus ai 21 di Lui, a 9 di sere,
Cjase Candussi Pasiani, place Garibaldi, a Romans dal Lusinç, (dentri tal câs che al sedi brut timp)
conciert cun Caamaño& Ameixeiras (Galizie).

 

(MUSICHE)_ Joibe ai 22 di Lui, a 9 di sere, (in colaborazion cun Fieste dal Emigrant),
Aree de fieste di Lusevare,
Conciert dopli cun Caamaño& Ameixeiras (Galizie) e Felix Lalù (Ladinie anauniche).

 

(MUSICHE)_ Vinars ai 23 di Lui, a 9 di sere, (in colaborazion cu la associazion Amîs da Mont Quarine),
Cantine produtôrs Cormons, vie Vino della Pace 31, Cormons (dentri tal câs che al sedi brut timp)
Conciert dopli cun Ezpalak (Paîs Basc) e Orko Trio cun Fabian Riz (Friûl).

(MUSICHE)_ Sabide ai 24 di Lui, a 9 di sere,
In place Venerio a Udin (ancje se al è brut timp)
Suns Friûl. Conciert cun Cristian Mauro, Trabeat, Vididule Project, Nicole Coceancig e Ezpalak (Paîs Basc).

(MUSICHE)_ Domenie ai 25 di Lui, a 9 di sere,
sul Cuel di S. Martin a Dartigne (tal câs che al sedi brut timp intal Teatri Lavaroni in place Marnico 20)
Conciert dopli cun Drumlanduo (Friûl) e Dania O. Tausen (Isulis Føroyar).

 

(MUSICHE)_ Lunis ai 26 di Lui, a 9 di sere,
ae Cort Casa della Musica di Puçui,
Conciert cun Dania O. Tausen (Isulis Føroyar).

 

(LETERATURE)_ Martars ai 27 di Lui, a 6 sore sere,
Librarie “Tarantola”, vie Vittorio Veneto 20, a Udin
Dibatiment leterari cun Cira Crespo (Paîs Basc)
Baginen. Lis feminis che a àn fat sù il Paîs Basc.

 

(LETERATURE)_ Martars ai 27 di Lui, a 9 di sere,
Place dal Comun, a Murùs (tal câs che al sedi brut timp, intal Auditorium “Riedo Puppo”)
Dibatiment leterari cun Angelo Floramo (Friûl) e Andrea Giraudo (Ocitanie)
«Ieu … que plor e vau cantan». Trobadors, i mestris ocitans di Dante

 

(CINE)_ Miercus ai 28 di Lui, a 8 di sere
Al Visionario di vie Asquini, a Udin
Proiezion di Bogre di Fredo Valla (Ocitanie)

 

(CINE)_ Joibe ai 29 di Lui, a 8 e mieze di sere
Al Visionario di vie Asquini, a Udin
Proiezion di Ane (Paîs Basc). Prime vision intal Stât talian

 

(MUSICHE)_ Vinars ai 30 di Lui, a 9 di sere,
inte Cort di vie Canonica 25, a Lavarian (tal câs che al sedi brut timp intal Auditorium, place S. Paolino)
Conciert dopli cun Land of Maybe (Isulis Føroyar) e Daniela Pes (Sardegne).

 

(MUSICHE)_ Sabide ai 31 di Lui, a 9 di sere
Intal prât dal Cjistiel di Udin (tal câs che al sedi brut timp intal Teatri Gnûf “Giovanni da Udine”)
Suns Europe. Conciert cun Brût&Madone (Friûl), Daniela Pes (Sardegne), Land of Maybe (Isulis Føroyar), Liher (Paîs Basc) e Ursina (Cjanton dai Grisons)

 

(MUSICHE)_ Domenie 1n di Avost, a 11 mancul un cuart di sere
Mont dai Pins, a Feagne, inte suaze dal Festival Art Tal Ort di Feagne
Conciert dai Liher (Paîs Basc).

 

 

===============================
Ufici stampe “Suns Europe”: Eleonora Cuberli | 340.3546890 | press.cuberli@gmail.com |
===============================