Di Jugn a Novembar dal 2022
Dal Istât ae Sierade, undis events in dut, uns trente ospits, in vot Comuns dal Friûl: il Festival des arts intes lenghis minorizadis si rinove une altre volte
UDIN – Art, contaminazion, talent, pluralisim linguistic, creativitât! Suns Europe al sarà, inmò une volte, dut chest! Il festival des arts in lenghe minorizade – inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût Basc Etxepare e di cetancj altris sogjets publics e privâts, internazionâi e di chenti – al è pront par tornâ a menâ in Friûl musiche, cine, teatri e leterature declinâts intes lenghis minoritariis dal Continent Vieri.
Daspò di une anteprime in colaborazion cul CEC di Udin (la proiezion al Visionario dal cine catalan «Alcarràs» – che al à vinçût l’Ors di Aur al festival di Berlin – ancje in lenghe origjinâl), chest an la rassegne e tacarà ai 30 di Jugn, par sierâsi ai 26 di Novembar, cemût che al è stât sclarît vie pe conference stampe che si è davuelte inte sede udinese de Regjon Autonome Friûl-Vignesie Julie, ae presince di Pierpaolo Roberti, assessôr regjonâl cun deleghe aes lenghis minoritariis; Fabrizio Cigolot, assessôr ae culture dal Comun di Udin; Eros Cisilino, president de ARLeF – Agjenzie Regjonâl pe Lenghe Furlane; Carli Pup, president de cooperative Informazione Friulana e Leo Virgili, diretôr artistic dal Festival. La otave edizion di Suns Europe e sarà duncje un miscliç jenfri il formât de manifestazion dai prins agns, che si faseve tra Novembar e Dicembar, e chel “gnûf” estîf, causionât de pandemie. Ancje chest an, il Festival si davuelzarà in diviers puescj, cjapant dentri vot Comuns dal Friûl (Dartigne, Cormons, Feagne, Mortean, Murùs, Puçui, Romans dal Lusinç, Udin) in undis events (che a deventaran inmò di plui cu la sezion de Sierade!). Par cumò, i ospits a saran uns trente di lôr, stant che no si pues fissâ ancjemò cun esatece il numar definitîf, parcè che nol è stât individuât il cast che al impiarà il Teatri Gnûf “Giovanni da Udine” ai 26 di Novembar, pal conciert finâl!
La reson e je clare: «Vie pes setemanis stadis, o vin vierzude une clamade internazionâl (https://www.sunseurope.com/it/suns-europe-bant-pe-sezion-musical-2022/) che si sierarà dome ai 31 di Lui – al à sclarît Leo Virgili – duncje par savê cuâi che a saran i artiscj e di li che a vignaran, i vûl puartade inmò un pocje di pazience ».
Za dulinvie dal Istât, dut câs, no mancjaran lis presincis di difûr dal Friûl cun cualchidun dai protagoniscj dal calendari che al rive di Ocitanie, Sardegne, Gales e Paîs Basc.
«La Regjon e da la sô poie a Suns Europe, festival des arts in lenghe minoritarie, pe valence strategjiche che e permet di ricognossi la identitât dal Friûl Vignesie Julie difûr dai nestris confins» al à declarât l’assessôr regjonâl aes Lenghis minoritariis, Pierpaolo Roberti. «Daspò di doi agns di pandemie, la gnove formule che e ten adun intun unic cartelon events di Jugn a Novembar e je un segnâl di otimisim e di valôr culturâl une vore alt pandût di bande des comunitâts minoritariis, buinis di esprimi une ricjece particolâr e cetant grande, che e sclarìs ben l’impegn de Regjon intal prudelâlis e intal promovilis». Po dopo, l’assessôr al à ancje marcât «il valôr turistic dal festival che nus permetarà di fâ cognossi il nestri teritori ancje di là dal confin, in plui di rindi plui salts i leams cu lis comunitâts linguistichis di dute Europe inte cognossince vicendevule».
Il president de ARLeF, Eros Cisilino, al à ricuardât cemût che «graciis a Suns Europe ancje chest an il Friûl al deventarà il centri de Europe» e cemût che «no podìn che vênt braùre». «Il Festival – al è lât indenant – al è dal sigûr une ecelence tal setôr artistic di dut il nestri continent. Aromai a son vot edizions che al puarte te nestre tiere une ricjece espressive straordenarie e che al rint tangjibii i valôrs dal plurilinguisim; lu fâs cun modalitâts che forsit no son stimadis "canonichis" e che propit par chest a son ancjemò plui impuartantis. Cu lis tantis formis di espression artistiche che Suns Europe al cîr di valorizâ, e graciis al mût che lu fâs, chest festival al rive a fevelâ aes gjenerazions plui zovinis che in chê ocasion a puedin doprâ, une volte in plui, la lôr lenghe intune otiche di scambi, creativitât e modernitât».
«Intal so rûl di capitâl storiche e culturâl dal Friûl e tant che pont di riferiment dal secont bacin linguistic minoritari talian par grandece, la citât di Udin e je braurose di podê dâi acet ae viertidure dal Festival des lenghis minoritariis Suns Europe – al à declarât Fabrizio Cigolot, assessôr ae culture dal Comun di Udin -. No cate i grancj progrès fats intai ultins decenis intal setôr legjislatîf, il percors pal ricognossiment di chestis lenghis, che cheste Aministrazion e à di simpri a cûr, al è ben lontan dal podêsi considerâ sierât.
Par chest o crôt che un event di cheste fate, bon di cjapâ dentri desenis di artiscj e nuie di mancul che vot comuns dal nestri teritori, e sedi une ocasion di no pierdi par tornâi parsore di un teme cussì delicât tant che chel des lenghis regjonâls presintis in Europe e dal dirit di chei che lis fevelin di doprâlis ancje a nivel istituzionâl».
«Tun Istât siôr di concierts e di events, dongje di ufrîi al public une cerce di uns pocjis tra lis miôr produzions artistichis in lenghe minorizade o vin ancje chê di stiçâ la gole di cognossi la culture, la storie e lis vicendis des comunitâts rapresentadis di chestis lenghis. Si vûl vierzi un barcon suntune Europe plurâl, inmagante e plene di snait ma che si le cognòs inmò masse pôc e che ancje il Friûl i fâs part ad in plen».
«Intai ultins doi agns, il sierâ continui e i moments grivis pai events culturâi nus àn obleâts a organizâ events plui scurtâts in colaborazion cui Comuns. Viodût il sucès di cheste formule la Cooperative Informazione Friulana e à decidût di tignî vive chê struture. Po dopo, o tornarìn a proponi la fase “storiche” dal Invier al Teatri “Giovanni da Udine”, cul concierton – al à sierât Virgili -, cence dut câs rinunziâ a chescj impuartants incuintris estîfs».
IL PROGRAM ESTÎF – Puartant indenant la sô mission – ‘Dirit ae lenghe, dirit ae diversitât’, ven a stâi lavorâ par “promovi lis produzions artistichis contemporaniis intes lenghis minorizadis di Europe cun chê di prudelâ la costruzion di une Europe diferente, unide intes diversitât e che si fonde parsore dai dirits, dal pluralisim, dal rispiet e de colaborazion” – Suns Europe chest an si vierzarà intal cûr di Udin, in place Libertât (al Teatri Palamostre tal câs di ploie) cuntun conciert targât “Suns Friûl”, par cure dal furlan Loris Vescovo, a tacâ des 9 di sere. Tal indoman, aes 7 di sere, invezit, il Visio Garden (Visionario, Udin) al darà acet al incuintri che al varà par protagoniste la ocitane Alidé Sans. La cjantante si esibirà invezit ai 2 e ai 3 di Lui, simpri aes 9 di sere, prime a Vilalte di Feagne li de Cjase di Catine e la dì dopo te Cort di vie Canoniche 25, a Lavarian (Auditorium in place “S. Paolino”, tal câs di ploie). Cualchi dì dopo, ai 7 di Lui, a fâ di protagonist al sarà il progjet musicâl Meigama, formât di Mauro Palmas e Frantziscu Medda, (Sardegne) in conciert aes 9 di sere al fuart di Sante Margarite, intal comun di Murùs. Suns Europe al larà indevant simpri intal segn de musiche ai 8 di Lui, aes 9 di sere, cul galês Carwyn Ellis sul Cuel di Sant Martin, a Dartigne (tal câs di ploie Teatri Lavaroni). Ae aziende agricule Gradnik di Cormons, ai 9 di Lui, simpri aes 9 di sere, adun cui sarts Meigama a montaran sul palc i furlans Franco Giordani e Davide Tomasetig. Il galês Ellis si esibirà di gnûf inte Cort de Cjase de Musiche di Puçui (dentri tal câs di ploie) ai 10 di Lui, aes 9 di sere. Spazi al Paîs Basc ai 13 e ai 14 di Lui: prime cu la presentazion dal libri Bestaldean cun Jaione Dorai e Ernesto Prat (li de librarie Tarantola di Udin aes 6 sot sere); la dì dopo cul conciert di Sara Zozaya inte Cort de biblioteche di Romans dal Lusinç, aes 9 di sere. Un ultin apontament al sierarà l'Istât di Suns Europe in place Libertât, a Udin (Teatri “San Giorgio” tal câs di ploie), ai 15 di Lui, aes 9 di sere, cun Sara Zozaya e cualchidun dai musiciscj protagoniscj dal progjet dedicât aes Lotis dal Cormôr (Friûl): Simone Piva, Alvise Nodale, Nicole Coceancig, Fabrizio Citossi, Devid Strussiat, Guido Carrara e Lussia di Uanis, Corâl La tela.
SUNS EUROPE – Suns Europe al è il festival european des arts performativis in lenghe minorizade (tiermin che al marche dutis chês lenghis che ur ven dineade la pussibilitât di jessi dopradis in cualsisei ambit de vite di ducj i dîs in maniere normâl e al stes nivel di une altre lenghe). Nassût intal 2009 in Friûl, cûr multilengâl de Europe, Suns al jere un concors musicâl pes comunitâts minoritariis de Europe di aree alpine e mediteranie. Daspò il festival al è mudât in Suns Europe, un lûc di incuintri e di scambi tra artiscj di grups linguistics minoritaris dal continent e une ocasion par dutis lis comunitâts europeanis di cjapâ cussience dai propris dirits linguistics e ancje de impuartance dal pluralisim culturâl tant che patrimoni, dirit e oportunitât par ducj, in Friûl e no dome. Il Festival al è organizât de Cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cul contribût dal Istitût Basc Etxepare, des associazions Amîs de Mont Quarine e Damatrà, dal CEC Centri Espressions Cinematografichis. Cun di plui, si zove de colaborazion di cetancj sogjets publics e privâts, tant che i Comuns di Dartigne, Mortean, Murùs, Puçui e Romans dal Lusinç, la associazion “Amici del Teatro” di Dartigne, la Societât Filarmoniche di Puçui, il Liberatori di Art “Fulvio Zonch” di Romans dal Lusinç, il circul Cas*Aupa di Udin e lis associazions Inniò, Babel (Sardegne) e Stichting REUR (Basse Sassonie). Suns Europe al à savût trasformâ il Friûl intune crosere di culturis, lenghis e artiscj, creant contaminazion e confront e lassant spazi a une produzion artistiche di valôr assolût.
Dut il program e lis informazions si ju cjate su www.sunseurope.com e te pagjine Facebook | Instagram |
I APONTAMENTS ESTÎFS DI SUNS EUROPE 2022 (ducj a jentrade libare)
ai 30 di Jugn, aes 9 di sere
Loris Vescovo (Friûl) – conciert targât Suns Friûl
Place Libertât, Udin (Teatri Palamostre tal câs di ploie)
il 1n di Lui, aes 7 di sere
«È begut de libertat…» cun Alidé Sans (Ocitanie-Val di Aran) – incuintri
Visio Garden, Visionario, Udin
ai 2 di Lui, aes 9 di sere
Alidé Sans (Ocitanie-Val di Aran) – conciert
Cjase di Catine, Vilalte di Feagne
ai 3 di Lui, aes 9 di sere
Alidé Sans (Ocitanie-Val di Aran) – conciert
Cort di vie Canoniche 25, a Lavarian (Auditorium in place “S. Paolino”, tal câs di ploie)
ai 7 di Lui, aes 9 di sere
Meigama (Sardegne) – conciert
Fuart di Sante Margarite, Murùs
ai 8 di Lui, aes 9 di sere
Carwyn Ellis (Gales) – conciert
Cuel di Sant Martin, Dartigne (tal câs di ploie Teatri Lavaroni)
ai 9 di Lui, aes 9 di sere
Meigama (Sardegne) + Franco Giordani e Davide Tomasetig (Friûl)
Aziende agricule Gradnik, Cormons
ai 10 di Lui, aes 9 di sere
Carwyn Ellis (Gales) – conciert
Cort de Cjase de Musiche di Puçui (dentri tal câs di ploie)
ai 13 di Lui, aes 6 sot sere
«Bestaldean» cun Jaione Dorai e Ernesto Prat (Paîs Basc) – presentazion
Librarie Tarantola, Udin
ai 14 di Lui, aes 9 di sere
Sara Zozaya (Paîs Basc) – conciert
Cort de biblioteche, Romans dal Lusinç
ai 15 di Lui, aes 9 di sere
Sara Zozaya (Paîs Basc) + Cjançons dal Cormôr (Friûl) – conciert
Place Libertât, Udin (Teatri “San Giorgio” tal câs di ploie)
Ufficio stampa “Suns Europe”: Eleonora Cuberli | 340.3546890 | press.cuberli@gmail.com |