Si tache a Udin cul cjantautôr furlan Loris Vescovo, in conciert in place Libertà. Daspò Alidé Sans e menarà il public ae scuvierte de Val di Aran jenfri peraulis e musiche
UDIN – Ve che o sin! E tache la otave edizion di Suns Europe: il festival des arts in lenghe minorizade inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût Basc Etxepare e di cetancj altris sogjets publics e privâts, internazionâi e di chenti.
AI 30 DI JUGN – Si tache a Udin, ai 30 di Jugn, aes 9 di sere, cul conciert di Loris Vescovo (jentrade sore nuie). Vie par chest event targât Suns Friûl il cjantautôr al puartarà parsore dal palc di place Libertà (teatri Palamostre se al plûf) i tocs che si cjatin tal so cuint disc: “Adalt”. Tant che chel di prime, “Penisolâti” (Targhe Tenco 2014), ancje chest lavôr al è un struc cetant fin di colôrs cjapâts in prestit di popui di latitudins diviersis. A acompagnâ Loris in chest viaç di suns al sarà un grup gnûf, formât di Massimo Silverio, Nicholas Remondino e Leo Virgili, bogns di rompi la tradizion par butâsi incuintri di lûcs inesplorâts.
IL PRIN DI LUI – Il festival che al mene ancjemò une volte in Friûl musiche, cine, teatri e leterature declinâts intes lenghis minoritariis dal Continent Vieri al larà dilunc cul prin di Lui, aes 7 di sere, al Visio Garden (Visionario, vie Asquini), li che al è in program «È begut de libertat…»: incuintri plurilengâl cu la cjantautore ocitane Alidé Sans. L’event (jentrade sore nuie), inmaneât in colaborazion cul CEC – Centri Espressions Cinematografichis di Udin, al vignarà moderât di Marco Stolfo e al menarà il public ae scuvierte de Val di Aran, un cjanâl tai Pireneus dentri de Comunitât autonome de Catalogne, indulà che si fevele la lenghe d’òc. Ambassadore di ecezion di chest microcosmi unic e je la zovine ativiste e cjantautore Alidé Sans, che i siei tocs par ocitan aranês a frontin temis universâi cuntune atenzion particolâr pal sociâl.
AI 2 E AI 3 DI LUI – Si torne ae musiche ai 2 e ai 3 di Lui, propit cu lis esibizions di Alidé Sans (jentrade sore nuie). Ai 2 di Lui, a tacâ des 9 di sere, e cjatarà acet inte Cjase di Catine, a Vilalte di Feagne, la dì dopo, ae stesse ore, e sarà invezit li de Cort di vie Canoniche 25, a Lavarian (intal auditorium di place “S. Paolino”, se al plûf). La “poesie libertarie” di cheste autore si misclice cui ritmis globâi di soul, rock e hip hop, che nus tornin indaûr intune forme acustiche direte e plene di passion. Cognossi Alidé e je une ocasion par viazâ intun dai puescj plui interessants di Europe pal aspiet linguistic, midiant de sensibilitât di une artiste e femine zovine ma une vore cussiente de sô identitât.
Suns Europe (di Jugn a Novembar dal 2022) al è il festival european des arts performativis in lenghe minorizade (tiermin che al marche dutis chês lenghis che ur ven dineade la pussibilitât di jessi dopradis in cualsisei ambit de vite di ducj i dîs in maniere normâl e al stes nivel di une altre lenghe). Nassût intal 2009 in Friûl, cûr multilengâl de Europe, Suns al jere un concors musicâl pes comunitâts minoritariis de Europe di aree alpine e mediteranie. Daspò il festival al è mudât in Suns Europe, un lûc di incuintri e di scambi tra artiscj di grups linguistics minoritaris dal continent e une ocasion par dutis lis comunitâts europeanis di cjapâ cussience dai propris dirits linguistics e ancje de impuartance dal pluralisim culturâl tant che patrimoni, dirit e oportunitât par ducj, in Friûl e no dome. Il Festival al è organizât de Cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cul contribût dal Istitût Basc
Etxepare, des associazions Amîs de Mont Quarine e Damatrà, dal CEC Centri Espressions Cinematografichis. Cun di plui, si zove de colaborazion di cetancj sogjets publics e privâts, tant che i
Comuns di Dartigne, Mortean, Murùs, Puçui e Romans dal Lusinç, la associazion “Amici del Teatro” di
Dartigne, la Societât Filarmoniche di Puçui, il Liberatori di Art “Fulvio Zonch” di Romans dal Lusinç, il circul
Cas*Aupa di Udin e lis associazions Inniò, Babel (Sardegne) e Stichting REUR (Basse Sassonie). Suns
Europe al à savût trasformâ il Friûl intune crosere di culturis, lenghis e artiscj, creant contaminazion e
confront e lassant spazi a une produzion artistiche di valôr assolût.
Dut il program e lis informazions si ju cjate su www.sunseurope.com e te pagjine Facebook | Instagram |
I APONTAMENTS ESTÎFS DI SUNS EUROPE 2022 (ducj a jentrade libare)
ai 30 di Jugn, aes 9 di sere
Loris Vescovo (Friûl) – conciert targât Suns Friûl
Place Libertà, Udin (Teatri Palamostre tal câs di ploie)
il 1n di Lui, aes 7 di sere
«È begut de libertat…» cun Alidé Sans (Ocitanie-Val di Aran) – incuintri
Visio Garden, Visionario, Udin
ai 2 di Lui, aes 9 di sere
Alidé Sans (Ocitanie-Val di Aran) – conciert
Cjase di Catine, Vilalte di Feagne
ai 3 di Lui, aes 9 di sere
Alidé Sans (Ocitanie-Val di Aran) – conciert
Cort di vie Canoniche 25, a Lavarian (Auditorium in place “S. Paolino”, tal câs di ploie)
ai 7 di Lui, aes 9 di sere
Mauro Palmas a Francesco Medda (Sardegne) – conciert
Fuart di Sante Margarite, Murùs
ai 8 di Lui, aes 9 di sere
Carwyn Ellis (Gales) – conciert
Cuel di Sant Martin, Dartigne (tal câs di ploie Teatri Lavaroni)
ai 9 di Lui, aes 9 di sere
Mauro Palmas a Francesco Medda (Sardegne) + Franco Giordani e Davide Tomasetig (Friûl)
Aziende agricule Gradnik, Cormons
ai 10 di Lui, aes 9 di sere
Carwyn Ellis (Gales) – conciert
Cort de Cjase de Musiche di Puçui (dentri tal câs di ploie)
ai 13 di Lui, aes 6 sot sere
«Bestaldean» cun Jaione Dorai e Ernesto Prat (Paîs Basc) – presentazion
Librarie Tarantola, Udin
ai 14 di Lui, aes 9 di sere
Sara Zozaya (Paîs Basc) – conciert
Cort de biblioteche, Romans dal Lusinç
ai 15 di Lui, aes 9 di sere
Sara Zozaya (Paîs Basc) + Cjançons dal Cormôr (Friûl) – conciert
Place Libertà, Udin (Teatri “San Giorgio” tal câs di ploie