Cjistiel di Udin / (tal câs di ploie) Teatri Gnûf “Giovanni da Udine”
conciert cun:
Brût & Madone (Friûl)
Une sdrondenade tes orelis e une provocazion che si ripet simpri gnove tai lôr concierts memorabii. Intal lôr metalcore si struchin lis esperiencis musicâls precedentis dai membris, dal death metal di Slowmotion Apocalypse e Rumors of Gehenna al punk hardcore dai Rabiosi. Al è zaromai dal 2006 che i Brût & Madone a cjolin ator i lûcs comuns dal e sul Friûl…
Daniela Pes (Sardegne)
A mieç tra tradizion sarde, eletroniche e folk, Daniela Pes e je une des vôs plui origjinâls de musiche sarde dal dì di vuê. Fate cognossi de vitorie tal Premi Andrea Parodi e de partecipazion a Musicultura tal 2018, Daniela e sarà sul palc cul pianist Mario Ganau par ufrî une grampe di baladis incjantadoris dal savôr eletroacustic fûr dal spazi e dal timp.
Liher (Paîs Basc)
La vôs mo cjalde, mo gherbe di Lide Hernando si poie cun grande personalitât su lis ghitaris gnervosis dai Liher. Cheste misture esplosive e je daûr a fâ di cheste formazion basche un dai grups plui popolârs de sene musicâl di Euskal Herria. Il lôr ultin album “Hemen Herensugeak Daude” al è un concept di denunzie su violence e sessisim.
Land of Maybe (Føroyar)
Land of Maybe al è un grup che al rive des fredis e inmagantis isulis Føroyar. “Glotti”, il lôr prin album, al è jessût che no son nancje sîs mês ma al palese un sunôr cussì madûr e ricercjât che al da di maravee. I tocs pop dai Land of Maybe a àn intor i colôrs cjalts dal jazz nordic plui fin.
Ursina (Cjanton dai Grisons)
Des elegantis cjançons pop di Ursina al travane a clâr l’amôr pe lenghe, pai paisaçs e pai suns des sôs monts. Nassude tun borc tal cûr dai Grisons e à studiât, viazât e vivût intal Nord de Europe par decidi po di tornâ a cjase e scrivi cjançons. Tocs che a fevelin di amôr, lûcs, personis e sperancis bandonadis e di trop che al sedi biel e sante scugne pierdisi in lôr.
–
jentrade libare cun prenotazion