‘Tumasch è’ al vinç Suns Europe 2017

UDIN – «La serade e je stade maraveose e, come par solit, il nivel musicâl al è stât une vore alt. In mert al vincidôr no ai voie di dâ un judizi artistic, su chel e à za dite la sô la jurie. I ten invezit a marcâ cemût che chest an e à vinçût la persone che e à savût imbastî cun ducj lis relazions plui bielis e che e à capît di plui il spirt di Suns Europe». Leo Virgili, diretôr artistic de manifestazion, al à piturât cussì ‘Tumasch è’, il vincidôr de tierce edizion dal Festival des arts in lenghe minorizade che si à tignût a Udin dai 30 di Novembar ai 2 di Dicembar.
‘Tumasch è’
Di passe cuindis agns Thomas Cathomen al sune, al cjante e al scrîf ancje par rumanç. Tumasch è al è il non dal so progjet plui resint, in balance tra pop, rock e cjançon di autôr, e a scjavaç tra Europe e Americhis, tra il Cjanton dai Grisons (di dulà che al rive e che al à rapresentât a Suns Europe 2017) e il Messic.
La jurie, il secont e il tierç puest
Onno Falkena, president de jurie tecniche de serade finâl – formade ancje di Enerit Furyak (Paîs Basc), Gruff Rhys (Gales), Carin Marzaro (Friûl), Stefano Degioanni (Ocitanie), Jachen Prevost (Cjanton dai Grisons), Bert Kamping (Basse Sassonie), Ruben Dominguez (Galizie), Mathieu Scialino (Bretagne / Friûl) – al à spiegât cemût che, cun chel so mût dolç di cjantâ e di sunâ, ‘Tumasch è’ al à savût creâ un moment di incjant. Platade daûr di une ande minude e semplice, la sô musiche e palesave un alc di gjeniâl. E propite chest al à sburtât i zurâts a assegnâi il prin puest. A decidi il vincidôr però nol è stât dome il vôt de jurie tecniche, ma ancje chel dal public in sale: ‘Tumasch è’ al à cjapât juste une grampe di preferencis in mancul di Isa Zwart (provincie di Drenthe, Paîs Bas), la plui votade dal public. Secont puest par La basu (Paîs Basc) che cul so snait e cuntun toc a cjaval di plui stîi e je stade une vore preseade. I energjetics Ebel Elektrik (Bretagne), che a àn scjaldât il palc dal Teatri Gnûf cu la lôr ghitare, a son rivâts tierçs.
Premi ae cariere
La serade finâl – sflandorose, plene di colôrs e di emozions – e à rispuindût, compagn des edizions stadis, aes spietis de int. A dâi il bon acet ai artiscj i àn pensât i doi presentadôrs – Natalie Norma Fella e Michele Polo – che a àn condusût la serade cun grande professionalitât ma ancje cuntune ande legre che e à concuistât il public. Sul palc, denant di une platee atente, si à scoltât vôs, suns e ritmis di une Europe “unide tes diversitâts”. Dongje dai artiscj za nomenâts, il public al è preseâts sei chei altris musiciscj in gare – Adwaith (Gales), Esposa (Galizie), Franco Giordani (Friûl) – sei i ospits Namgar (Buriazie, republiche de Federazion Russe ad ôr de Mongolie) e Gruff Rhys (Gales) che, intant de serade, al à ancje ricevût dal president de ARLeF, Lorenzo Fabbro, un premi ae cariere.

La Catalogne
E no je finide chi. Sul palc dal teatron e à sunât ancje Joana Gomila Folk Souvenir, in rapresentance dai Paîs Catalans. Joana e je stade saludade dal batimans cjalt dal public e di un messaç che si impareve in sene: “No Esteu Sols”, no sês di bessôi. «Al jere il messaç che i tignivin a mandâi a ducj i catalans. No sês di bessôi. Il nestri – al à spiegât Carli Pup, president di Informazione Friulana (editore di Radio Onde Furlane) – al è un festival artistic dulà che a fâ di paron a son la musiche, il cine e la leterature, ma là che no si dismenteìn dai dirits. Dai dirits linguistics di ducj i popui minorizâts e dai dirits nazionâi parie. In chest moment storic, duncje, no podevin no sintîsi dongje dai catalans e mandâur la nestre solidarietât». Inmò une volte, Suns Europe al à proponût trê zornadis di art, miscliçaments, snait, pluralisim linguistic e creativitât. Inmò une volte al à savût mostrâ la bielece de diversitât.
Il Festival
Suns Europe al è un progjet inmaneât des cooperativis Informazione Friulana (editore di Radio Onde Furlane) e Puntozero cu la poie de ARLeF (Agjenzie Regjonâl pe Lenghe Furlane), de Regjon Friûl – Vignesie Julie, dal Comun di Udin e de Fondazion Friuli, cu la colaborazion de Fondazion Teatro Nuovo Giovanni da Udine e dal Babel Film Festival, e cul patrocini dal Consei de Europe.