Ynys + Remei de Ca la Fresca + Giganto

Vinars 18 otubar, 21:00
Yardie, Pradaman (UD)
Jentrade libare

YNYS (Gales)
Origjinaris di Aberystwyth, sul litorâl ocidentâl dal Gales, i Ynys a metin dongje cun sensibilitât rare armoniis suturnis e tapêts di efiets vintage ‘70/’80. La palette sonore di chest grup e piture di psichedelie une grampe di tocs pop gjeniâi parturîts dal produtôr e rangjadôr Dylan Hughes. Il lôr prin album omonim al è calcolât un dai miôr debuts discografics dai ultins agns in Gales.

REMEI DE CA LA FRESCA (Paîs Catalans)
Lenghis uçadis e prontis a taçâ ogni confin stilistic cence fâ presonîrs. I Remei de Ca la Fresca a son un dai grups plui dificii di classificâ tra chei de poliedriche etichete musicâl Indian Runners. Nol è hip hop, nol è soul, nol è art rock e nancje funk o prog… Poesie? Teatri? Sedi ce che e sedi, cheste bugade di aiar fresc che e ven jù des monts dal Montseny e je cjamade di une autoironie scjassose e alergjiche a ogni eufemisim.

GIGANTO (Cjanton dai Grisons)
Gjigant di non e ancje tai fats… chest artist al è fûr di dubi il re dal hip hop rumanç e lis sôs cjançons a àn une sdrume di scoltis in linie. Cetant cognossût pes sôs colaborazions cuntun pôcs dal nons plui grues dal rap svuizar, Giganto al è ancje un popolâr speaker radiofonic de RTR, la radio television de Svuizare rumance. La sô musiche e cîr di jessi simpri fûr dai schemis e e svuinche i stereotips e i clichés dal gangsta rap cun tescj che a scrutinin la atualitât cuntune ironie salade.