Suns Europe al torne in version estive e al met fûr il bant gnûf!
Par partecipâ si à di compilâ il modul in Rêt dentri dai 6 di Jugn dal 2021
Dopo de esperience positive dal 2020, ancje chest an Suns Europe – inmaneât de cooperative Informazione Friulana, editore di Radio Onde Furlane, cu la poie economiche de Regjon Autonome Friûl –Vignesie Julie, de ARLeF – Agjenzie Regjonâl pe Lenghe Furlane e de Fondazion Friuli, e intune cul Comun di Udin, cul Istitût Basc Etxepare e di diviersis realtâts publichis e privadis, locâls e internazionâls – si presentarà di gnûf in version estive, tra i mês di Lui e Avost dal 2021, ator par varis lûcs dal Friûl.
Tra lis primis novitâts di segnalâ si à il lanç dal bant gnûf! Inte edizion stade, di fat, a front de situazion ingredeade causade de pandemie, i organizadôrs a vevin decidût di lassâ di bande la competizion e di invidâ une serie di grups e musiciscj “dongje” di Suns Europe. Chest an, invezit, si torne, almancul in part, “aes lidrîs”. Se di une bande si à confermade la version estive, impen di chê “classiche” invernâl, di chê altre bande e torne a partî la ricercje di formazions e musiciscj che la lôr produzion e je espression di une des comunitâts linguistichis minorizadis de Europe.
Lis candidaturis a varan di jessi presentadis dentri dai 6 di Jugn dal 2021 compilant il modul di pueste che si cjate ae direzion https://www.sunseurope.com/fur/bant-pe-sezion-musical-2021.
Si ametin dome composizions origjinâls e atentis ae inovazion, che il lôr judizi al sarà dut intes mans dal comitât artistic di Suns Europe. I finaliscj selezionâts a saran invidâts in Friûl par sunâ dal vîf a Udin intant de serade principâl dal festival o – e cheste e je une altre novitât – intun dai concierts che si fasaran sul teritori. Cemût che a previodin lis normis sanitariis in vore, ai ospits internazionâi selezionâts si ur podarà domandâ un tampon PCR SARS-CoV2 tes 48 oris prime de partence. Par cualsisei dibisugne, sclariment o informazion si pues scrivi a: info@sunseurope.com .