Place dal Comun, Murùs 21.00
«Ieu…que plor e vau cantan». Trobadors, i mestris ocitans di Dante Incuintri cun Angelo Floramo (Friûl) e Andrea Giraudo (Ocitanie)
La liriche in lenghe d’óc – poesie e cjançon – dai trobadors e rapresente la prime vere leterature intune lenghe romanze. A cjaval tra i secui XII e XIII trobadors e trobairitz, in plui di fâ dal ocitan la lenghe di riferiment de leterature europeane, a dan une gnove centralitât al rûl de femine e slargjin ator pal continent ideis e visions gnovis e, par diviers aspiets, rivoluzionariis. I poetis ocitans a son i “mestris” di cetancj autôrs europeans, a tacâ di Dante Alighieri che i rint omaç – te figure dal poete aquitan Arnaut Daniel – ancje te sô Comedie (là che, in mût dal dut straordenari, al dopre l’ocitan in vot viers dal Purgatori). Tun scambi culturâl che nol ten cont dai confins e nancje di concets tant che “maioritari” o “minoritari”, la influence ocitane si fâs sintî ancje in Friûl, massime sot dal patriarcje Beltram.
PROTAGONISCJ: Angelo Floramo al è nassût a Udin (Friûl), al insegne storie e leterature e al colabore di consulent pe biblioteche Guarneriane di S. Denêl. Al sgarfe tai archivis, al scrîf par rivistis sei par furlan che par talian, al è autôr di cetancj libris e, tra chescj, Balkan Circus (2013), L’osteria dei passi perduti (2017) e La veglia di Ljuba (2018). Andrea Giraudo al è nassût a Cuneo. Laureât in letaris, al à po otignût dotorâts di ricercje in storie, leterature e filologjie romanzis alì de École Pratique des Hautes Études di Parîs e de Universitât di Siena, dulà che cumò al è assegnist di ricercje. Membri de Association Internationale d’Études Occitanes e de Société de Langues et de Littératures Médiévales d’Oc et d’Oïl, al è autôr di articui e tescj dedicâts ae leterature de Ete di Mieç e ai sermons valdês.
–
jentrade libare cun prenotazion