No ducj a san che a son stadis lis dotis musicâls e un strument origjinâl fat sù di lui, il “passepuart” che i à permetût a Leonardo di jentrâ te cort di Milan e di inviâ alì la sô stagjon plui impuartante. La musiche e pues deventâ ancje l’imprest par fâ cognossi une comunitât – cu la sô culture, la sô storie e la sô lenghe – fûr dai siei confins. Chest al vâl, par esempli, pai ocitans là che, massime tes valadis dal Piemont là che e vîf cheste comunitât, la musiche e je stade un imprest centrâl par tornâ a scuvierzi la proprie identitât e par fâle cognossi ator. E la musiche – des melodiis patriarcjinis a Mainerio par rivâ ae gnove musiche furlane – e à zuiât une funzion identitarie impuartante ancje in Friûl. I doi protagoniscj de serade – l’ocitan Sergio Berardo e il furlan Angelo Floramo – nus compagnin intun viaç inzirlôs par secui e tieris diferents cu la musiche des peraulis e cu lis peraulis de musiche.
Protagoniscj: Sergio Berardo al è un innomenât polistrumentis e cjantant ocitan. Al è la vôs e la anime dai Lou Dalfin, il grup plui impuartant des Valadis Ocitanis dal Piemont, e al è cjapât dentri di cetancj progjets di ricercje, di promozion e di reinvenzion de musiche popolâr ocitane. Tra chescj al è Gran Bal Dub, crosere di folk, reggae e eletroniche, metude adun cun Madaski, tastierist dai Africa Unite. Angelo Floramo al è nassût a Udin (Friûl), al insegne storie e leterature e al colabore di consulent pe biblioteche Guarneriane di S. Denêl. Al sgarfe tai archivis, al scrîf par rivistis sei par furlan che par talian, al è autôr di cetancj libris e, tra chescj, Balkan Circus (2013), L’osteria dei passi perduti (2017) e La veglia di Ljuba (2018).
Introdusût e moderât di: Marco Stolfo
Cuant: sabide ai 19 di Setembar
Dulà: place di Trave, Lauc
Lenghis di riferiment: furlan, ocitan, talian