1. FURLAN
Famee linguistiche: neolatine.
Lûcs là che si fevele: il Friûl si slargje suntune aree di pôc plui di 8.200 chilometris cuadrâts che pe plui part e je cjapade dentri te Regjon Autonome Friûl – Vignesie Julie. Une part dal Friûl storic, ven a dî il Mandament di Puart, si cjate invezit inte Regjon Venit.
Consistence numeriche: nol esist nissun censiment uficiâl ma si stime che a fevelâ par furlan a sedin tra lis 600 e lis 700 mil personis intal Friûl storic, che si ur zontin miârs di furlans sparniçâts intai lûcs de emigrazion.
Status: al è ricognossût come “lenghe minoritarie” dal Stât talian e de Regjon Autonome dal Friûl – Vignesie Julie. Chel istès la sô presince te scuele, tes istituzions e tai mieçs di comunicazion e je limitade.
2. ocitan / occitan
Famee linguistiche: neolatine.
Lûcs là che si fevele: la Ocitanie (Occitània) e je la plui grande nazion cence Stât de Europe e si slargje su 190 mil chilometris cuadrâts. E cjape dentri la plui part dal Sud dal Stât francês (lis sôs regjons principâls a son Alvernie, Dolfinât, Lenghedoc, Limusin, Provence e Vasconie) ma ancje une part des valadis alpinis dal Piemont e de Ligurie e la Val di Aran (intal Principât di Catalogne).
Consistence numeriche: nol esist nissun censiment uficiâl, lis stimis a van dal mieç milion ai 3 milions di personis.
Status: l’ocitan al è calcolât dal Stât francês come “lenghe regjonâl” e al è ricognossût come “lenghe minoritarie” intal Stât talian. In ducj i doi i câs la lenghe e cjate un spazi une vore limitât inte scuele e tai media, e margjinâl intes istituzions. Inte Val di Aran al gjolt invezit di un statût di couficialitât.
3. sart / sardu
Famee linguistiche: neolatine.
Lûcs là che si fevele: il sart al è la lenghe proprie de Sardegne, isule di uns 24 mil chilometris cuadrâts che e gjolt di un statût di autonomie dentri dal Stât talian.
Consistence numeriche: nol esist nissun censiment uficiâl ma si stime che il sart al sedi fevelât di sù par jù 1 milion e 200 mil personis.
Status: al è ricognossût come “lenghe minoritarie” dal Stât talian e de Regjon Autonome de Sardegne. Chel istès la sô presince te scuele, tes istituzions e tai mieçs di comunicazion e je limitade.
4. galês / cymraeg
Famee linguistiche: celtiche.
Lûcs là che si fevele: il cymraeg al è fevelât intal Gales (Cymru), une des nazions storichis che a formin il Ream Unît di Grande Bretagne e Irlande dal Nord.
Consistence numeriche: a fevelâ par galês a son uns 560 mil personis in Gales e sù par jù altris 100 mil in Ingletiere.
Status:la normative e ricognòs al galês un statût di couficialitât in Gales ancje se te realtât no si à une situazion di bilinguisim perfet.
5. basc / euskara
Famee linguistiche: indipendente.
Lûcs là che si fevele: il Paîs Basc (Euskal Herria) si slargje suntun teritori di passe 20 mil chilometris cuadrâts e, sul plan politic e aministratîf, al cjape dentri la Comunitât Autonome Basche e la Comunitât Forâl de Navare tal Ream di Spagne e la comunitât teritoriâl basche che e fâs part de Regjon de Gnove Aquitanie intal stât francês.
Consistence numeriche: plui o mancul 700 mil personis.
Status: la lenghe basche e je couficiâl inte Comunitât Autonome Basche e tune part de Navare (zone bascofone). Tal rest de Navare lis misuris di tutele a son limitadis o in cualchi câs a mancjin dal dut. Intal Paîs Basc sot aministrazion francese, l’euskara nol à un ricognossiment uficiâl ma al cjate un cualchi spazi te istruzion e te aministrazion publiche.